କେନ୍ଦ୍ରାପଡ଼ା: ସହରକୁ କୁପୋଷଣ ମୁକ୍ତ କରିବା ପାଇଁ ଆରମ୍ଭ ହୋଇଛି ପ୍ରୟାସ। ଏଭଳି ଏକ ଲକ୍ଷ୍ୟ ନେଇ ଗତ 23 ଜୁଲାଇରୁ କୁପୋଷଣ ମୁକ୍ତ ପାଇଁ ଏକ ତିନିମାସିଆ କାର୍ଯ୍ୟକ୍ରମ ଜିଲ୍ଲା ପ୍ରଶାସନ ପକ୍ଷରୁ ଆରମ୍ଭ ହୋଇଛି । ଜିଲ୍ଲାରେ ମୋଟ 113696 ଜଣ 0 ରୁ 5 ବର୍ଷ ପର୍ଯ୍ୟନ୍ତ ଶିଶୁଙ୍କୁ ଏହି କାର୍ଯ୍ୟକ୍ରମରେ ସାମିଲ କରାଯିବା ଲକ୍ଷ୍ୟ ରହିଛି।
ଏଯାବତ 52094ଜଣ ଶିଶୁଙ୍କୁ ଏହି କାର୍ଯ୍ୟକ୍ରମରେ ସାମିଲ କରାଯାଇଥିଲା ବେଳେ 760ଜଣ ଶିଶୁଙ୍କ ଓଜନ କରାଯାଇଛି । ଏମାନଙ୍କ ମଧ୍ୟରୁ 177ଜଣ ଶିଶୁ ଆବଶ୍ୟକତାଠାରୁ କମ ଓଜନର ଓ 41ଜଣ କୁପୋଷଣର ଶିକାର ହୋଇଥିବା ସୂଚନା ଦେଇଛନ୍ତି ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଊର୍ମିଳା ମିଶ୍ର। ଏଥିସହିତ କୁପୋଷଣର ଶିକାର ହୋଇଥିବା ଶିଶୁମାନଙ୍କୁ ପର୍ଯ୍ୟାୟକ୍ରମେ ଜିଲ୍ଲାରେ ଥିବା ଦୁଇଟି ଚିକିତ୍ସାଳୟରେ ଚିକିତ୍ସା ଓ ଉପଯୁକ୍ତ ଖାଦ୍ୟ ଦିଆଯିବା ପାଇଁ ମଧ୍ୟ ବ୍ୟବସ୍ଥା କରାଯାଉଛି।
ଜିଲ୍ଲାର ମହାକାଳପଡ଼ା ଓ ରାଜନଗର ଅଞ୍ଚଳରେ କୁପୋଷଣର ଶିକାର ହୋଇଥିବା ଶିଶୁଙ୍କ ସଂଖ୍ୟା ଅଧିକ ରହିଥିବା କହିଛନ୍ତି ମୁଖ୍ୟ ଚିକିତ୍ସାଧିକାରୀ। ଶୁକ୍ରବାର ଅପରାହ୍ନରେ ଜିଲ୍ଲାପାଳଙ୍କ ସଦଭାବନା ଗୃହରେ ‘କୁପୋଷଣ ମୁକ୍ତ କେନ୍ଦ୍ରାପଡ଼ା’ ସ୍ଲୋଗାନରେ ଆୟୋଜିତ ସାମ୍ବାଦିକ ସମ୍ମିଳନୀରେ ଜିଲ୍ଲାପାଳ ସମର୍ଥ ବର୍ମା ଅଧ୍ୟକ୍ଷତା କରିଥିଲେ । ପ୍ରତ୍ୟେକ ମାସର 23ତାରିଖରେ ଶିଶୁଙ୍କ ଛତୁଆ ପ୍ରସ୍ତୁତି ଏବଂ ମାସର 1 ତାରିଖରେ ପ୍ରତ୍ୟକ ଅଙ୍ଗନବାଡି ସେଣ୍ଟରରେ ଛତୁଆ ଦିଆଯିବା ନେଇ କଡା ନିର୍ଦ୍ଦେଶ ଥିବା କହିଛନ୍ତି ଜିଲ୍ଲାପାଳ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
