କେନ୍ଦ୍ରାପଡା: ଶିକାର କରିବାକୁ ଆସି ଫସିଲା କୁମ୍ଭୀର । ଘଟଣାଟି ହେଉଛି ଜିଲ୍ଲାର ଇନ୍ଦୁପୁର ଅଞ୍ଚଳର । ଏଠାରେ ଥିବା ବିରୂପା ନଦୀରେ ଗତ 4 ବର୍ଷ ହେବ ଥିବା କୁମ୍ଭୀରଟି ମଇଁଷି, ଘୁଷୁରୀ, ଛେଳି ଓ ଗାଈ ଗୋରୁଙ୍କୁ ଆକ୍ରମଣ କରୁଥିବା ବେଳେ ସ୍ଥାନୀୟ ଅଞ୍ଚଳରେ କୋକୁଆ ଭୟ ସୃଷ୍ଟି ହୋଇଥିଲା । ସେପଟେ ଗତବର୍ଷ ଅକ୍ଟୋବର ମାସରେ କୁମ୍ଭୀରଟି ଜଣେ ଗାଈ ଜଗୁଆଳିଙ୍କୁ ଆକ୍ରମଣ କରି ଗୁରୁତର କରିଦେଇଥିଲା । ଏନେଇ ଦୀର୍ଘ ଦିନ ହେବ କୁମ୍ଭୀରଟିକୁ ଧରିବାକୁ ଚେଷ୍ଟା ଜାରି ରହିଥିଲା ।
ସୂଚନା ମୁତାବକ, ଗତ ରବିବାର ରାତିରେ କୁମ୍ଭୀରଟି ସ୍ଥାନୀୟ ଅଞ୍ଚଳର ଘୁଷୁରୀ ପାଳକ ବିଭୂତି ଘଡେଇଙ୍କର ଘୁଷୁରୀ ପଲରୁ ଏକ ଘୁଷୁରୀ ଟାଣି ଆଣିଥିଲା । ହେଲେ ଏହାକୁ ଅଧା ଖାଇ ସେ ନଦୀ ପାଖରେ ଥିବା ଜମିରେ ଛାଡି ଯାଇଥିଲା । ଏନେଇ ସମ୍ପୃକ୍ତ ଘୁଷୁରୀ ପାଳକ ମୃତ ଘୁଷୁରୀଟିକୁ ଏକ ଖାଲରେ ପକାଇ ଫାସ ବସାଇଥିଲେ । କୁମ୍ଭୀର ପୁଣି ଆସିବାର ଅପେକ୍ଷା କରିବା ପରେ ସୋମବାର ସନ୍ଧ୍ୟା ସମୟରେ କୁମ୍ଭୀରଟି ପୁଣି ଆସି ଖାଲରୁ ଘୁଷୁରୀକୁ ଖାଇବାକୁ ଉଦ୍ୟମ କରିବା ବେଳେ ସେ ଫେରିବା ବାଟକୁ ମାଟି ପକାଇ ବନ୍ଦ କରିଦେଇଥିଲେ । ଫଳରେ ନଦୀକୁ ଫେରିନପାରି କୁମ୍ଭୀରଟି ଖାଲରେ ଫସି ଯାଇଥିଲା ।
କୁମ୍ଭୀରଟି ପ୍ରାୟ 12 ଫୁଟ ଲମ୍ବ ହୋଇଥିବା ଅନୁମାନ କରାଯାଉଥିବା ବେଳେ ଏହାକୁ ଦେଖିବା ପାଇଁ ଘଟଣାସ୍ଥଳରେ ଜମିଛି ସ୍ଥାନୀୟ ବାସିନ୍ଦାଙ୍କ ଭିଡ ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
