କେନ୍ଦ୍ରାପଡ଼ା: ପଞ୍ଚାୟତ ପାଣ୍ଠିରୁ 6 ଲକ୍ଷ 50 ହଜାର ଟଙ୍କା ବ୍ୟୟରେ ମହାକାଳପଡ଼ା ପଞ୍ଚାୟତର ବିଭିନ୍ନ ଖୁଣ୍ଟରେ ଲାଗିଥିଲା ଏଲଇଡି ଲାଇଟ । ଏହା ଗତ ଏକ ମାସ ତଳେ ଲଗାଯାଇଥିବା ବେଳେ ବର୍ତ୍ତମାନ ଏଗୁଡିକ ଆଉ ଜଳିବା ସ୍ଥିତିରେ ନାହାଁନ୍ତି । ତେବେ ଲାଇଟ ନଜଳିବା ସମ୍ପର୍କରେ ଅଭିଯୋଗ ପାଇବା ପରେ ଜିଲ୍ଲାପାଳ ନିଜେ ତଦନ୍ତ ପାଇଁ ପହଞ୍ଚିଛନ୍ତି ଉକ୍ତ ପଞ୍ଚାୟତରେ ।
କେନ୍ଦ୍ରାପଡ଼ା ଜିଲ୍ଲାପାଳ ସମର୍ଥ ବର୍ମା ମହାକାଳପଡ଼ା ପଞ୍ଚାୟତ ଗସ୍ତ ସମୟରେ ଗ୍ରାମବାସୀ ଏଲଇଡି ଲାଇଟ ବିଷୟରେ ଅଭିଯୋଗ ଆଣିବାରୁ ଜିଲ୍ଲାପାଳ ନିଜେ ବିଭିନ୍ନ ଖୁଣ୍ଟ ନିକଟକୁ ଯାଇ ଉକ୍ତ ଲାଇଟର ତଦନ୍ତ କରିଛନ୍ତି । ତଦନ୍ତ ସମୟରେ ଅଳ୍ପ କିଛି ଟଙ୍କା ଖର୍ଚ୍ଚ କରାଯାଇ ନିମ୍ନମାନର ଲାଇଟ ଲଗାଯାଇଥିବା ଅନୁମାନ କରିଛନ୍ତି ଜିଲ୍ଲାପାଳ ।
ଏନେଇ ଜିଲ୍ଲା ପ୍ରକଳ୍ପ ଅଧିକାରୀଙ୍କୁ ସରଜମିନ ତଦନ୍ତ ପାଇଁ ନିର୍ଦ୍ଦେଶ ଦେବାସହ ତଦନ୍ତ ରିପୋର୍ଟ ଆସିଲେ ଏହା ଉପରେ ଜିଲ୍ଲାପାଳ କାର୍ଯ୍ୟାନୁଷ୍ଠାନ ନେବେ ବୋଲି ସୂଚନା ମିଳିଛି । ଏହି ଲାଇଟ ଲଗାଇବା ଘୋଟାଲା ଜିଲ୍ଳାର ଅନ୍ୟ ଅଞ୍ଚଳରେ ମଧ୍ୟ ଦେଖିବାକୁ ମିଳିଛି । ପଞ୍ଚାୟତ ଜନ ପ୍ରତିନିଧି ଓ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ମିଶି ଏଭଳି ଘୋଟାଲା କରିଥିବା ଅଭିଯୋଗ କରିଛନ୍ତି ଜନସାଧାରଣ।
କେନ୍ଦ୍ରାପଡ଼ାରୁ ରାଧାକାନ୍ତ ମହାନ୍ତି, ଇଟିଭି ଭାରତ
