କେନ୍ଦ୍ରାପଡା:ବାରହା ଆକ୍ରମଣରେ ଜଣେ ଗୁରୁତର। ଏ ଘଟଣା ଘଟିଛି ମହାକାଳପଡ଼ା ଥାନା ଅଧିନସ୍ଥ ଓରତ ଗାଁରେ। ଏହି ଗ୍ରାମର ଭ୍ରମରବର ସେଠୀ ବିଲକୁ ଘାଷ ଆଣିବାକୁ ଯାଇଥିବା ବେଳେ ବୁଦା ମଧ୍ୟରୁ ବାହାରି ଏକ ବାରହା ତାଙ୍କୁ ଆକ୍ରମଣ କରିଥିଲା । ଏଥିରେ ଭ୍ରମରବରଙ୍କ ଦୁଇଗୋଡ଼ କ୍ଷତାକ୍ତ ହେବା ସହ ବାମହାତରେ ମଧ୍ୟ କ୍ଷତ ସୃଷ୍ଟି ହୋଇଛି।
ତାଙ୍କ ଡାକ ଶୁଣିବା ପରେ ସେଠାକୁ ଶୌଚ ହେବାକୁ ଯାଇଥିବା ଗଜେନ୍ଦ୍ର ସେଠୀ ପହଁଞ୍ଚିବାରୁ ବାରହା ମଧ୍ୟ ତାଙ୍କୁ ଆକ୍ରମଣ କରିଥିବା ଜଣାପଡିଛି। ପରେ ଉଭୟଙ୍କୁ କେନ୍ଦ୍ରାପଡ଼ା ଡାକ୍ତରଖାନାରେ ଭର୍ତ୍ତି କରାଯାଇଥିଲା । ହେଲେ ସେଠାରେ ଭ୍ରମରବରଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ କଟକ ବଡ଼ ଡ଼ାକ୍ତରଖାନାକୁ ଚିକିତ୍ସା ପାଇଁ ସ୍ଥାନାନ୍ତର କରାଯାଇଛି।
ତେବେ ଧାନ ପାଚି ଆସୁଥିବାରୁ ଧାନ ଖାଇବାକୁ ଆସି ବାରହା ଆକ୍ରମଣ କରିବା ଘଟଣା ପ୍ରତିବର୍ଷ ନଜିର ରହିଛି । ହେଲେ ବନବିଭାଗ ପକ୍ଷରୁ ଏନେଇ କୌଣସି ପଦକ୍ଷେପ ନିଆଯାଉନଥିବାରୁ ସାଧାରଣରେ ଅସନ୍ତୋଷ ଦେଖିବାକୁ ମିଳିଛି।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
