କେନ୍ଦ୍ରାପଡ଼ା: ସାର ! ମୋ ବାପାଙ୍କ ଚାକିରି ଫେରାଇ ଦିଅ କହି ନିଲମ୍ବିତ ହୋଇଥିବା ଜଣେ ସମବାୟ ସମିତିର ସମ୍ପାଦକଙ୍କ କୁନି ଝିଅ ସେବା ସମବାୟ ସମୂହର ସହକାରୀ ନିବନ୍ଧକ(ARCS)ଙ୍କ ପାଦଧରିବା ଘଟଣା କେନ୍ଦ୍ରାପଡ଼ା ଜିଲ୍ଲାରେ ବେଶ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି ।
ସୂଚନାନୁଯାୟୀ, କେନ୍ଦ୍ରାପଡ଼ା ବଗଡ଼ା ପ୍ରାଥମିକ ସେବା ସମବାୟ ସମିତିର ସମ୍ପାଦକ କାଳନ୍ଦୀ ଚରଣ ବିଶ୍ୱାଳ, ତାଙ୍କ ଭାଇ ଓ କିଛି ଦୁର୍ବୃତ୍ତ ଗତ ଏପ୍ରିଲ 14 ତାରିଖ ଦିନ ଭରତପୁର ସେବା ସମବାୟ ସମିତିରେ କାର୍ଯ୍ୟରତ ସମ୍ପାଦକ ସୁବୋଧ ଲେଙ୍କା ଘରେ ନଥିବା ବେଳେ ତାଙ୍କ ପତ୍ନୀଙ୍କୁ ଅଶ୍ଳିଳ ଭାଷାରେ ଗାଳିଗୁଲଜ ଓ ଅସଦାଚରଣ କରିଥିଲେ । ଏହି ଘଟଣାରେ କାଳନ୍ଦୀ ଓ ଅନ୍ୟ ବ୍ୟକ୍ତିଙ୍କ ବିରୋଧରେ ସଦର ଥାନାରେ ସୁବୋଧଙ୍କ ପତ୍ନୀ ଏକ ଲିଖିତ ଏତଲା ମଧ୍ୟ ଦେଇଥିଲେ ।
ତେବେ 16 ତାରିଖ ଦିନ ସୁବୋଧ ଓ କାଳନ୍ଦୀଙ୍କ ମଧ୍ୟରେ ଏହି ଘଟଣାକୁ କେନ୍ଦ୍ରକରି କାଳନ୍ଦୀ, ସୁବୋଧଙ୍କ ନାମରେ ଏତଲା ଦେଇଥିଲେ । ତେବେ ଉଭୟ ପକ୍ଷର ଆପତ୍ତି ଅଭିଯୋଗକୁ ବିଚାର ନକରି ବିଭାଗୀୟ କର୍ତ୍ତୃପକ୍ଷ ସୁବୋଧଙ୍କୁ ଗତକାଲି ସନ୍ଧ୍ୟାରେ ନିଲମ୍ବନ କରିବା ପରେ ସୁବୋଧଙ୍କ ଓ ତାଙ୍କ ପରିବାର ARCS କାର୍ଯ୍ୟାଳୟ ସମ୍ମୁଖରେ ଆମରଣ ଅନଶନରେ ବସିଛନ୍ତି ।
ମଧ୍ୟାହ୍ନରେ ARCS ବାହାରକୁ ଆସିବା ପରେ ସୁବୋଧଙ୍କ କୁନିଝିଅ ARCSଙ୍କ ପାଦଧରି ବାପାଙ୍କ ଚାକିରି ଫେରାଇ ଦେବା ପାଇଁ ଆକୁଳ ନିବେଦନ କରିବା ସରକାରୀ କାର୍ଯ୍ୟାଳୟରେ ପକ୍ଷପାତିତା ଉପରେ ଅଙ୍ଗୁଳି ନିର୍ଦ୍ଦେଶ କରୁଛି । ଏନେଇ ସୁବୋଧ ଘଟଣାର ଉଚ୍ଚସ୍ତରୀୟ ତଦନ୍ତ ଦାବି କରୁଥିବା ବେଳେ କର୍ତ୍ତୃପକ୍ଷ ମନମାନି କରି ତାଙ୍କୁ ନିଲମ୍ବନ କରିବା ଘଟଣାକୁ ନେଇ ସେ ହତୋତ୍ସାହିତ ହେବା ସହ ଭବିଷ୍ୟତରେ ସପରିବାରେ ଆତ୍ମହତ୍ୟା କରିବାର ଚେତାବନୀ ଦେଇଛନ୍ତି । ଅପରପକ୍ଷରେ ଅଧିକାରୀଙ୍କୁ ଏନେଇ ପଚାରିବାରୁ ସେ ଘଟଣା ଦିନ ଉପସ୍ଥିତ ନଥିଲେ ଓ ଖୁବଶୀଘ୍ର ସୁବୋଧଙ୍କୁ ନ୍ୟାୟ ଦିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି । ଏନେଇ କାଳନ୍ଦୀଙ୍କ ସହ ଯୋଗାଯୋଗ କରିଥିଲେ ମଧ୍ୟ ସେ ଏହି ଘଟଣା ସମ୍ପର୍କରେ କିଛି କହିପାରିବେ ନାହିଁ ବୋଲି କହିଛନ୍ତି ।
କେନ୍ଦ୍ରାପଡ଼ାରୁ ରାଧାକାନ୍ତ ମହାନ୍ତି, ଇଟିଭି ଭାରତ
