କେନ୍ଦ୍ରାପଡା: ଆଦର୍ଶ ବିଦ୍ୟାଳୟ ଛାତ୍ରଛାତ୍ରୀଙ୍କ ଉପରେ ବଜ୍ରପାତ । ଫଳରେ ୧୮ଜଣ ଛାତ୍ରଛାତ୍ରୀ ଆହତ ହୋଇଥିବା ବେଳେ ୨ଜଣ ଗୁରୁତର ଥିବା ଜଣାପଡିଛି । ଗୁରୁତର ୨ ପିଲାଙ୍କୁ କେନ୍ଦ୍ରାପଡ଼ା ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଛି । ଏଭଳି ଅଭାବନୀୟ ଘଟଣା ଘଟିଛି କେନ୍ଦ୍ରାପଡା ଗରଦପୁର ବ୍ଲକ କାର୍ଯ୍ୟଳୟ ଠାରୁ ୧୦ କିମି ଦୂରରେ ଅବସ୍ଥିତ କୁଦାନଗରୀ ହାଇସ୍କୁଲ ପରିସରରେ ଥିବା ଅସ୍ଥାୟୀ ଆଦର୍ଶ ବିଦ୍ୟାଳୟରେ ।
ସୂଚନା ଅନୁଯାୟୀ, ଶନିବାର ହୋଇଥିଲେ ମଧ୍ୟ ଆଦର୍ଶ ବିଦ୍ୟାଳୟର ନିୟମାନୁଯାୟୀ ୧୦ଟା ରୁ ୪ଟା ପର୍ଯ୍ୟନ୍ତ ସ୍କୁଲରେ ପାଠ ପଢା ହୋଇଥାଏ । ଗତକାଲି(ଶନିବାର) ଅପରାହ୍ନ ପ୍ରାୟ ୩ଟା ୪୦ ମିନିଟ ସମୟରେ ହଠାତ ବର୍ଷା ଓ ବଜ୍ରପାତ ହେବାରୁ ଷଷ୍ଠ ଓ ସପ୍ତମ ଶ୍ରେଣୀ ଗୃହରେ ଲାଗିଥିବା ଫ୍ୟାନ,ବଲବ ଓ କମ୍ପ୍ୟୁଟର ଆଦି ପୋଡିଯାଇ ପ୍ରଚଣ୍ଡ ଶବ୍ଦ କରି ଫାଟି ଯାଇଥିଲା ଏବଂ ଅଗ୍ନି ନିର୍ବାପିତ ହୋଇଥିଲା । ସେହି ସମୟରେ ଶ୍ରେଣୀ ଗୃହରେ କୌଣସି ଶିକ୍ଷକ କିମ୍ବା ଶିକ୍ଷୟତ୍ରୀ ଉପସ୍ଥିତ ନଥିଲେ । ଯାହାଫଳରେ ଛାତ୍ରଛାତ୍ରୀମାନେ ଭୟଭୀତ ହୋଇ ଚିତ୍କାର କରି ଚେତାଶୂନ୍ୟ ହୋଇ ଶ୍ରେଣୀ ଗୃହ ମଧ୍ୟରେ ପଡି ଯାଇଥିଲେ ।
ତେବେ ବିଦ୍ୟାଳୟର ପ୍ରଧାନ ଶିକ୍ଷୟତ୍ରୀ ସନ୍ତୋଶୀ ଦାସ ସାମଲ ଅନ୍ୟାନ୍ୟ ଶିକ୍ଷକ ମାନଙ୍କ ସହାୟତାରେ ଆହତ ଛାତ୍ରଛାତ୍ରୀ ମାନଙ୍କୁ ପାଟକୁରା ଡାକ୍ତରଖାନାକୁ ଚିକିତ୍ସା ପାଇଁ ନେଇଥିଲେ । ସେଠାରେ ଥିବା ଡାକ୍ତର ହିମାଶୁଂଭୁଷଣ ଷଢଙ୍ଗୀ ଓ ଡାକ୍ତର ପ୍ରଶାନ୍ତ କୁମାର ଜେନାଙ୍କ ତତ୍ତ୍ଵାବଧାନରେ ସମସ୍ତ ଛାତ୍ରଛାତ୍ରୀମାନଙ୍କୁ ଆଶୁ ଚିକିତ୍ସା କରାଯାଇଥିଲା । ତେବେ ସେମାନଙ୍କ ମଧ୍ୟରୁ ଆଦ୍ୟାଶା ଲକ୍ଷ୍ମୀ ସାମଲ, ଅମ୍ରିତା ପଣ୍ଡାଙ୍କ ଅବସ୍ଥା ଗୁରୁତର ଥିବାରୁ କେନ୍ଦ୍ରାପଡା ଜିଲ୍ଲା ଚିକିତ୍ସାଳୟକୁ ପଠାଇ ଦିଆଯାଇଥିବା ସୂଚନା ମିଳିଛି ।
ଏହା ମଧ୍ୟ ପଢନ୍ତୁ- ପୋଖରୀରେ ଗାଧୋଉଥିଲେ ଯୁବତୀ, ଉପରୁ ଖସିଲା ମୃତ୍ୟୁ
ତେବେ ଏହି ଖବରପାଇ ରାଜ୍ୟ ବାହାରେ ଥିବା ଖାଦ୍ୟ ଯୋଗାଣ ଖାଉଟି କଲ୍ୟାଣ,ସମବାୟ ଓ ଉଚ୍ଚଶିକ୍ଷାମନ୍ତ୍ରୀ ଅତନୁ ସବ୍ୟସାଚୀ ନାୟକ ଦୁଃଖ ପ୍ରକାଶ କରିବା ସହିତ ପାଟକୁରା ଡାକ୍ତରଖାନାର ଅଧିକାରୀ ଡାକ୍ତର ହିମାଂଶୁ ଭୁଷଣ ଷଢଙ୍ଗୀ ଓ କେନ୍ଦ୍ରାପଡା ସିଡିଏମଓଙ୍କ ସହିତ ଟେଲିଫୋନ ଯୋଗେ ଯୋଗାଯୋଗ କରି ଆହତ ଛାତ୍ରଛାତ୍ରୀମାନଙ୍କୁ ଉପଯୁକ୍ତ ସ୍ୱାସ୍ଥ୍ୟ ସେବା ଯୋଗାଇ ଦେବାକୁ ନିର୍ଦ୍ଦେଶ ଦେଇଛନ୍ତି । ସେହିପରି ଏହି ଦୁଃଖଦ ଘଟଣାର ଖବର ପାଇ ପାଟକୁରା ବିଜେପି ନେତା ତେଜେଶ୍ୱର ପରିଡା,ବ୍ଲକ ଅଧ୍ୟକ୍ଷ ଅଭୟ ମହାରାଜ ପ୍ରମୁଖ ପାଟକୁରା କେନ୍ଦ୍ରାପଡା ଡାକ୍ତରଖାନାରେ ପହଞ୍ଚି ଆହତ ଛାତ୍ରଛାତ୍ରୀ ମାନଙ୍କ ସ୍ୱାସ୍ଥ୍ୟ ଅବସ୍ଥା ପଚାରି ବୁଝିଥିବା ଜଣାପଡିଛି।
ଇଟିଭି ଭାରତ, କେନ୍ଦ୍ରାପଡା
