ଫୁଲବାଣୀ: କନ୍ଧମାଳ ଜିଲ୍ଲାରେ ଜଣେ ନକଲି ସିଆରପିଏଫ ଅଫିସରକୁ ଗିରଫ କଲା କ.ନୂଆଗାଁ ପୋଲିସ । ଫିରିଙ୍ଗିଆ ଥାନା ଅଞ୍ଚଳର ଦୁଃଖୀଶ୍ୟାମ ଦିଗାଲ ଦୀର୍ଘ ଦିନ ହେବ ସିଆରପିଏଫ ଅଫିସର ପରିଚୟ ଦେଇ ଲୋକଙ୍କୁ ଭୟଭିତ କରୁଥିଲା ।
ସୂଚନା ଅନୁଯାୟୀ କିଛି ଦିନ ତଳେ କ.ନୂଆଗାଁ ଅଞ୍ଚଳର ଜଣେ ଦିବ୍ୟାଙ୍ଗ ନାବାଳିକାକୁ ଅପହରଣ କରିଥିଲା ଅଭିଯୁକ୍ତ । ଏଥିସହ ଅଫିସର କହି ଗୋଛାପଡା ଓ ସାଇନପଡା ଅଞ୍ଚଳରୁ ଦୁଇ ବାଇକ ଚାଳକଙ୍କୁ ଭୟ ଦେଖାଇ ଦୁଇଟି ବାଇକ ଲୁଟି ନେଇଥିଲା । ନାବାଳିକା ଅପହରଣ ଓ ବାଇକ ଲୁଟ ନେଇ ଥାନାରେ ଅଭିଯୋଗ ପରେ ତଦନ୍ତ କରି ନକଲି ଅଫିସର ଦୁଃଖୀଶ୍ୟାମକୁ ଗିରଫ କରିଛି ପୋଲିସ । ଏହାସହ ତାଠାରୁ ଦୁଇଟି ବାଇକ, ନକଲି ସିଆରପିଏଫ ପୋଷାକ, ଗୋଟିଏ ମୋବାଇଲ ଫୋନ, ସିମ କାର୍ଡ, ଏଟିଏମ କାର୍ଡ ଜବତ କରିଛି ।
ଅଭିଯୁକ୍ତ ଦୁଃଖୀଶ୍ୟାମ ନିଜକୁ ସିଆରପିଏଫ ଅଫିସର ଆକାଶ ମଲିକ କହି ଫୁଲବାଣୀ, ଗୋଛାପଡା, ଫିରିଙ୍ଗିଆ, କ.ନୂଆଗାଁ ଥାନା ଅଞ୍ଚଳରେ ବୁଲି ଲୁଟ କରୁଥିଲା । ତେବେ ଅଭିଯୁକ୍ତ ନାମରେ ଏକାଧିକ ଥାନାରେ ବିଭିନ୍ନ ମାମଲା ଥିବା ଜଣାପଡିଛି । ଗୋଛାପଡା ଓ ଫିରିଙ୍ଗିଆ ଥାନାରେ ପୂର୍ବରୁ ମାମଲା ରୁଜୁ ହୋଇଛି ଏବଂ ଅଧିକ ତଦନ୍ତ ଚାଲିଛି । ଗିରଫ ଦୁଃଖୀଶ୍ୟାମକୁ କୋର୍ଟ ଚାଲାଣ କରିଛି ପୋଲିସ ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
