ଓଜନ କମାଇବାଠୁ ନେଇ ମଧୁମେହ ଯାଏ, ଜିରା ପାଣିରୁ ମିଳିପାରେ ଏହି ଚମତ୍କାର ଫାଇଦା - Health benefits of Jeera water

Health benefits of Jeera water: ସମସ୍ତଙ୍କ ରୋଷେଇ ଘର ଜିରା ସହଜରେ ମିଳିଯାଏ । ଏହା କେବଳ ଖାଦ୍ୟର ସ୍ବାଦ ବଢାଏନି ବରଂ ସ୍ବାସ୍ଥ୍ୟ ପାଇଁ ବି ଖୁବ୍ ଉପକାରୀ । ଓଜନ କମାଇବାଠୁ ନେଇ ଡାଇବେଟିସ୍, କୋଲେଷ୍ଟ୍ରଲ ଯାଏ ଅନେକ ସ୍ବାସ୍ଥ୍ୟ ସମସ୍ୟା ଦୂର କରିବାରେ ସାହାଯ୍ୟ କରିପାରେ । ଅଧିକ ପଢନ୍ତୁ

Health benefits of Jeera water: ଜିରା ପ୍ରତ୍ୟେକ ରୋଷେଇ ଘରେ ବ୍ୟବହୃତ ହେଉଥିବା ଏକ ସାଧାରଣ ମସାଲା । ଡାଲମା ହେଉ କି ତରକାରୀ ସବୁଥିରେ ଜିରାର ବ୍ୟବହାର କରାଯାଏ । ହେଲେ ଆପଣ ଜାଣିଛନ୍ତି କି, ଏହା କେବଳ ଖାଦ୍ୟର ସ୍ବାଦ ବଢାଏନି ବରଂ ସ୍ବାସ୍ଥ୍ୟ ପାଇଁ ବି ଖୁବ୍ ଉପକାରୀ । ଅନୁସନ୍ଧାନକାରୀମାନେ ସ୍ପଷ୍ଟ କରିଛନ୍ତି ଯେ, ଜିରା ଅନେକ ସ୍ବାସ୍ଥ୍ୟପଯୋଗୀ ଗୁଣରେ ଭରପୂର । ଏଥିରେ ଭିଟାମିନ ସି, ଆଣ୍ଟିଅକ୍ସିଡାଣ୍ଟ ରହିଛି, ଯାହା ଆମ ଇମ୍ୟୁନିଟି ସିଷ୍ଟମ ମଜଭୁତ କରି ବିଭିନ୍ନ ରୋଗରୁ ରକ୍ଷା କରିବାରେ ସାହାଯ୍ୟ କରେ । ସେହିପରି ହଜମ ପ୍ରକ୍ରିୟା ଉନ୍ନତ କରିବାଠାରୁ ନେଇ ଓଜନ କମାଇବା, ବ୍ଲଡ ସୁଗାର ସ୍ତର ନିୟନ୍ତ୍ରଣ କରିବା ଯାଏ ପ୍ରତିଦିନ ଜିରା ପାଣି ପିଇବା ଫଳରେ ଏହିଭଳି ଅନେକ ଫାଇଦା ମିଳିଥାଏ ।

ଜିରାରେ ଅନେକ ଜରୁରୀ ଭିଟାମିନ ଓ ଖଣିଜ ସାର ରହିଛି, ଯାହା ସୁସ୍ଥ ରହିବା ପାଇଁ ଆବଶ୍ୟକ । ଏଥିରେ ଭିଟାମିନ ଏ, ଇ, ସି, କେ, ବି-ଭିଟାମିନ ଏବଂ ମ୍ୟାଗ୍ନେସିୟମ, ମାଙ୍ଗାନିଜ, କ୍ୟାଲସିୟମ, ଫସଫରସ୍, ଜିଙ୍କ, ପୋଟାସିୟମ ଭଳି ମିନେରାଲ ବା ଖଣିଜ ସାରା ମିଳେ । ଏସବୁ ପୋଷକ ତତ୍ତ୍ବ ଆମ ଶରୀରକୁ କାର୍ଯ୍ୟ କରିବା ପାଇଁ ଶକ୍ତି ଯୋଗାଏ । ଜିରାରେ ଫ୍ୟାଟ, ସୋଡିୟମ ଓ କୋଲେଷ୍ଟ୍ରଲ କମ୍ ଥାଏ । ସେହିପରି ଏଥିରେ ଥିବା କିଛି ବିଶେଷ ଯୌଗିକ ମେଡିସିନ ଭଳି କାମ କରେ । ଉଦାହରଣସୂରୁପ- ଏଥିରେ ଥାଇମୋଲ ଓ କ୍ୟୁମିନ ଏଲ୍ଡିହାଇଡ ଥାଏ, ଯାହା ଆପଣଙ୍କ ପେଟ ଭଲ ରଖିଥାଏ ଓ ହାନିକାରକ କୀଟାଣୁ ସହ ଲଢିବାକୁ ସାହାଯ୍ୟ କରେ । ଏଥିସହ ଜିରାରେ ଆଣ୍ଟି-ଅକ୍ସିଡାଣ୍ଟ ରହିଛି । ଏହା ଆପଣଙ୍କ ସେଲ୍ ଡ୍ୟାମେଜ ରୋକିଥାଏ ।

ଜିରାର ସ୍ବାସ୍ଥ୍ୟଗତ ଫାଇଦା:

ହଜମ ପ୍ରକ୍ରିୟା: ଜିରା ପାଣି ହଜମ ପ୍ରକ୍ରିୟାରେ ସାହାଯ୍ୟ କରେ । ଏହା ଶରୀର ଖାଦ୍ୟ ହଜମ ସହଜ କରିବା ସହ ଏଥିରୁ ଭଲ ପୋଷକ ତତ୍ତ୍ବ ଅବଶୋଷିତ କରିବାରେ କାମ କରେ । ଗ୍ୟାସ୍ ପାଇଁ ପେଟ ଫୁଲିଲେ କିମ୍ବା ଅସହଜ ଅନୁଭବ କରିଥିଲେ ଜିରା ପାଣି ପିଇବା ଦ୍ବାରା ଏହି ସମସ୍ୟା ଦୂର ହୋଇଥାଏ । ଏହା ପେଟରେ ଏସିଡ ରିଫ୍ଲକ୍ସ ବା ଏସିଡିଟି କମ୍ କରିଥାଏ, ଯାହାଫଳରେ ଖାଦ୍ୟ ଖାଇବା ପରେ ପେଟ ଫୁଲିବା କିମ୍ବା ଗ୍ୟାଷ୍ଟ୍ରିକ ଅନୁଭବ ହେବାର ସମ୍ଭାବନା କମ୍ ହୋଇଯାଏ ।

ଓଜନ ହ୍ରାସ: ବର୍ତ୍ତମାନ ଅନେକ ଲୋକ ନିଜର ଓଜନ ବୃଦ୍ଧିକୁ ନେଇ ଚିନ୍ତିତ । ଜିରା ପାଣି ମେଟାବୋଲିଜିମ ବୃଦ୍ଧି କରେ, ଯାହା କ୍ୟାଲୋରୀ ବର୍ଣ୍ଣ କରିବାରେ ସାହାଯ୍ୟ କରେ ଓ ଭୋକ ନିୟନ୍ତ୍ରଣ କରେ । ଜିରା ପାଣିରେ ଆଣ୍ଟିଅକ୍ସିଡାଣ୍ଟ ଓ ଭିଟାମିନ ଏ, ସି, କପର ଓ ମାଙ୍ଗାନିଜ ରହିଛି, ଏହା ଫ୍ୟାଟକୁ ଭାଙ୍ଗି ଓ ଭଲ ବ୍ୟାକ୍ଟେରିଆ ବଢାଇ ଓଜନ କମାଇବାରେ ସାହାଯ୍ୟ କରେ । ତେଣୁ ଓଜନ ନିୟନ୍ତ୍ରଣ କରିବାକୁ ଚାହୁଁଥିବା ଲୋକଙ୍କ ପାଇଁ ଜିରା ପାଣି ଏକ ଭଲ ଘରୋଇ ଉପାୟ ।

ସୁସ୍ଥ ତ୍ବଚା ଓ କେଶ: ଜିରା ପାଣି ଆଣ୍ଟିଅକ୍ସିଡାଣ୍ଟ ଗୁଣରେ ଭରପୂର ଥିବାରୁ ଏହା ଆପଣଙ୍କ ତ୍ବଚା ଓ କେଶ ସୁସ୍ଥ ରଖିବାରେ ସାହାଯ୍ୟ କରେ । ଏଥିରେ ଥିବା ଭିଟାମିନ ଓ ମିନେରାଲ ତ୍ବଚାରେ ଗ୍ଲୋ ଆଣେ ଓ କେଶ ମଜଭୁତ କରେ । ଏଥିସହ ଏହା ନ୍ୟାଚୁରାଲ ଡିଟକ୍ସିଫାୟର ଭାବେ କାମ କରେ । ଶରୀରରୁ ବିଷାକ୍ତ ପଦାର୍ଥ ବାହାର କରିବାରେ ସହାୟକ ହୁଏ ।

ହୃଦୟ ସ୍ବାସ୍ଥ୍ୟ: ଜିରା ପାଣି ପିଇବା ଦ୍ବାରା ଶରୀରରେ ଖରାପ କୋଲେଷ୍ଟ୍ରଲ କମ୍ ହୋଇଥାଏ । ଏହା ରକ୍ତଚାପ ନିୟନ୍ତ୍ରଣରେ ରଖିବା ସହ ରକ୍ତ ବାହିକାକୁ ଆରାମ ଦିଏ । ଯାହାର ଅର୍ଥ ହୃଦୟ ଉପରେ ଚାପ କମ୍ ହୁଏ । ନିୟମିତ ଜିରା ପାଣି ସେବନ କୋଲେଷ୍ଟ୍ରଲ ସ୍ତର, ରକ୍ତଚାପ ନିୟନ୍ତ୍ରଣ କରି ହୃଦୟକୁ ସୁସ୍ଥ ରଖେ ।

ବ୍ଲଡ ସୁଗାର କଣ୍ଟ୍ରୋଲ: ବ୍ଲଡ ସୁଗାର ନିୟନ୍ତ୍ରଣ କରିବାରେ ଇନସୁଲିନ ସାହାଯ୍ୟ କରେ । ଜିରା ପାଣି ଆପଣଙ୍କ ଶରୀରର କୋଷିକାଗୁଡିକୁ ଇନସୁଲିନ ପ୍ରତି ଅଧିକ ସମ୍ବେଦନଶୀଳ କରେ ଯାହାକି ଭଲ । ଏହା ଆପଣଙ୍କ ବ୍ଲଡ ସୁଗାର ସ୍ଥିର ରଖେ ଏବଂ ଯେପରି ଇନସୁଲିନ ଭଲ ଭାବେ ଉପଯୋଗ ହେବ ସେନେଇ କାର୍ଯ୍ୟ କରେ । ସେହିପରି ଜିରା ପାଣି ଆଇରନରେ ଭରପୂର ଥିବାରୁ ଏନିମିଆ ରୋଗୀଙ୍କ ପାଇଁ ଭଲ । ଏହା ହିମୋଗ୍ଲୋବିନ ଲେବୁଲ ବଢାଇବାରେ ମଧ୍ୟ ସାହାଯ୍ୟ କରେ ।

Source- https://www.healthline.com/nutrition/9-benefits-of-cumin#TOC_TITLE_HDR_9

https://redcliffelabs.com/myhealth/health/5-surprising-benefits-of-jeera-water-in-the-morning-you-would-want-to-know/

ଏହା ମଧ୍ୟ ପଢନ୍ତୁ: PCOS ସମସ୍ୟା ଥିବା ମହିଳା ମାଆ ହୋଇପାରିବ ତ ? ଏମିତି କହିଲେ ଡାକ୍ତର - PCOS problem in women ଏହା ମଧ୍ୟ ପଢନ୍ତୁ: ପୁରୁଷଙ୍କ ହାର୍ଟଆଟାକ୍‌ କାରଣ ହେଉଛି କି ପେଟର ଚର୍ବି, କ'ଣ କହୁଛି ରିସର୍ଚ୍ଚ ? - Can Belly Fat Causes Heart Attack

Disclaimer- ଏଠାରେ ପ୍ରଦତ୍ତ ସ୍ବାସ୍ଥ୍ୟ ସମ୍ବନ୍ଧୀୟ ସୂଚନା କେବଳ ଆପଣଙ୍କ ଜାଣିବା ପାଇଁ । ଏହା ଉପରେ ବିଚାର କରିବା ପୂର୍ବରୁ ଡାକ୍ତରଙ୍କ ପରାମର୍ଶ ନେବା ଭଲ ।