ଫୁଲବାଣୀ: ଦୁଇ ସପ୍ତାହ ଧରି ରାଜ୍ୟରେ ଜାରି ରହିଥିବା ଲଘୁଚାପଜନିତ ଲଗାଣ ବର୍ଷାରେ ରାଜ୍ୟର ବିଭିନ୍ନ ଜିଲ୍ଲାରେ ବେହାଲ ପରିସ୍ଥିତି । ଏମିତିରେ କନ୍ଧମାଳ ଜିଲ୍ଲାରେ ଲଗା ରହିଥିବା ପ୍ରବଳ ବର୍ଷା ଯୋଗୁଁ ଜିଲ୍ଲାର ବିଭିନ୍ନ ନଦୀରେ ପ୍ରବାହିତ ହେବାରେ ଲାଗିଛି ବନ୍ୟା ଜଳ । ବିଭିନ୍ନ ସ୍ଥାନରେ ବନ୍ୟା ଜଳ ପାଇଁ ଯୋଗାଯୋଗ ମଧ୍ୟ ବିଚ୍ଛିନ୍ନ ହୋଇଛି । ସେପଟେ ଫୁଲବାଣୀ ସମେତ ଅନେକ ସହର ଓ ଗାଁ ଗଣ୍ଡାରେ ଘରମାନଙ୍କରେ ବନ୍ୟା ପାଣି ପଶିବାରେ ଲାଗିଥିବା ଦେଖାଯାଇଛି ।
ଏପରି ସ୍ଥିତିରେ ଜିଲ୍ଲାର ଅନେକ ସ୍ଥାନରେ କଚ୍ଚା ଘର ଭାଙ୍ଗିଥିବା ମଧ୍ୟ ଦେଖିବାକୁ ମିଳିଛି । ସୂଚନା ମୁତାବକ ଜିଲ୍ଲାର ସାଲୁଙ୍କି, ଖଡଗ, ରାଉଳ, ଉତେଇ, ପିଲାସାଲୁଙ୍କି ଆଦି ନଦୀରେ ବନ୍ୟା ଜଳ ପ୍ରବାହିତ ଆରମ୍ଭ ହୋଇଥିବା ଦେଖାଯାଇଛି । ଏହାକୁ ନଜରରେ ରଖି ଜିଲ୍ଲାରେ ପାଣିପାଗ ବିଭାଗ ଅରେଞ୍ଚ ୱାର୍ଣ୍ଣିଂ ଜାରି କରିଛି । ସେପଟେ ଦୁଇ ଦିନର ଲଗାଣ ବର୍ଷା ପରେ ସହରର ନାଦିଖଣ୍ଡି ସାହି, ମାଷ୍ଟର ପଡା, ଆମ୍ବେଦକର ସାହି ଆଦି ଅଞ୍ଚଳରେ ଅନେକ ଘର ଏବେ ଜଳମଗ୍ନ । ଖବର ପାଇ ଦମକଳ ବାହିନୀ ସମ୍ପୃକ୍ତ ସ୍ଥାନମାନଙ୍କରେ ପହଞ୍ଚି ଜଳ ନିଷ୍କାସନ ପ୍ରକ୍ରିୟା ଜାରି ରଖିଛି ।
ତେବେ ତୁମୁଡିବନ୍ଧ ବ୍ଲକର ଝିରିପାଣି ପଞ୍ଚାୟତ, ଲଙ୍କାଗଡ ପଞ୍ଚାୟତ, କୋଟଗଡର ଗୁଗୁରମାହା, ମାରଳାଙ୍ଗ, ଧରାକୋଟ ସମେତ ଜିଲ୍ଲାର ଅନେକ ଅପହଞ୍ଚ ଗାଁ ଏବେ ପ୍ରବଳ ବର୍ଷା ଯୋଗୁଁ ବିଚ୍ଛିନ୍ନ ହୋଇଯାଇଛି । ଏହାର ମୁକାବିଲା ପାଇଁ ଜିଲ୍ଲା ପ୍ରଶାସନ ପ୍ରସ୍ତୁତ ଥିବା ପ୍ରକାଶ କରିଛି ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
