ଭବାନୀପାଟଣା: ହତ୍ୟାକାରୀକୁ ଆଜୀବନ କାରାଦଣ୍ଡ । ଆସାମୀକୁ ଆଜୀବନ କାରାଦଣ୍ଡ ଶୁଣାଇଛନ୍ତି କୋର୍ଟ । କଳାହାଣ୍ଡି ଜିଲ୍ଲାର ସଦର ଥାନା ଅନ୍ତର୍ଗତ ପାଷ୍ଟିକୁଡ଼ି ଗାଁରେ ୨୦୧୫ ମସିହାରେ ହୋଇଥିବା ହତ୍ୟାକାଣ୍ଡକୁ ନେଇ ଆଜି ଜିଲ୍ଲା ଦୌରାଜଜ୍ କୋର୍ଟରେ ଶୁଣାଣି ହୋଇଥିଲା ।
ସୂଚନା ଅନୁଯାୟୀ ୨୦୧୫ ମସିହା ନଭେମ୍ବର ୧୯ ତାରିଖରେ ପୂର୍ବ ଶତ୍ରୁତାରୁ ଅଭିଯୁକ୍ତ ଲକ୍ଷ୍ମୀଧର ନାୟକ ସେହି ଗାଁର ସୋମନାଥ ଗଣ୍ଡାଙ୍କୁ ଟାଙ୍ଗିଆରେ ହାଣି ହତ୍ୟା କରିଥିଲା । ଏନେଇ ମୃତ ସୋମନାଥଙ୍କ ବାପା ଭବାନୀପାଟଣା ସଦର ଥାନାରେ ଅଭିଯୋଗ କରିଥିଲେ । ଦଫା ୩୦୨ ଓ ଅନୁସୂଚିତ ଜାତି-ଜନଜାତି ଆକ୍ଟ ଅନୁସାରେ ପୋଲିସ ଏକ ମାମଲା ରୁଜୁ କରି ଆସାମୀକୁ ଗିରଫ କରିବା ସହ କୋର୍ଟ ଚାଲାଣ କରିଥିଲା ।
ଭବାନୀପାଟଣା ଜିଲ୍ଲା ଦୌରାଜଜ୍ ଦିପ୍ତୀ ରଞ୍ଜନ କାନୁନଗୋ ମାମଲାର ଶୁଣାଣି କରି ଆସାମୀକୁ ୨୦ ହଜାର ଟଙ୍କାର ଜୋରିମାନା ସହ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି । ଜୋରିମାନା ଅନାଦେୟ ୬ ମାସ ଅଧିକ ଜେଲ ଦଣ୍ତ ଦିଆଯିବ ବୋଲି ସୂଚନା ଦେଇଛନ୍ତି ସରକାରୀ ସ୍ବତନ୍ତ୍ର ପବ୍ଲିକ ପ୍ରସିକ୍ୟୁଟର ଜିତେନ୍ଦ୍ର ମହାନ୍ତି ।
ଇଟିଭି ଭାରତ, କଳାହାଣ୍ଡି
