ଭବାନୀପାଟଣା: ନିରବଚ୍ଛିନ୍ନ ବିଦ୍ୟୁତ ଯୋଗାଣ ଦାବିରେ ଧାରଣାରେ ବସିଲେ ଲୋକେ । ବାରମ୍ବାର ବିଦ୍ୟୁତ କାଟ ସହ ଲୋ-ଭୋଲ୍ଟେଜରେ ଅତିଷ୍ଠ ହୋଇ କଳାହାଣ୍ଡି ଜିଲ୍ଲା ଟି ରାମପୁର ବ୍ଲକ ଅଞ୍ଚଳରେ ରାଜରାସ୍ଥାକୁ ଓହ୍ଲାଇଛନ୍ତି ୮ ଟି ଗାଁର ଲୋକେ । ନୂତନ ଫିଡରରୁ ବିଦ୍ୟୁତ ଯୋଗାଣ ପାଇଁ ଦାବି ।
ଅଭିଯୋଗ ଅନୁଯାୟୀ, ବ୍ଲକର ଟିକ୍ରାପଡା, ପୋଇ ଗୁଡା, ଡାକି ବଣ୍ଡେଲ, ପିଣ୍ଡାପଦର, ମେଲ କୁନ୍ଧେଲ ଭଳି ୮ ଟି ଗ୍ରାମକୁ ବିଦ୍ୟୁତ ବିଭାଗ ପକ୍ଷରୁ ଗୁଣପୁର ସ୍ଥିତ ଫିଡରରୁ ବିଦ୍ୟୁତ୍ ଯୋଗାଣ କରାଯାଉଛି । ତେବେ ବାରମ୍ବାର ଏହି ଅଞ୍ଚଳରେ ବିଦ୍ୟୁତ କାଟ ହେବା ସହ ଲୋ ଭୋଲ୍ଟେଜ ଯୋଗୁଁ ଲୋକେ ଅତିଷ୍ଠ ହୋଇ ପଡ଼ିଥିବା ବେଳେ ସ୍ବଳ୍ପ ବର୍ଷା ହେଲେ ବିଦ୍ୟୁତ ସଂଯୋଗ ବନ୍ଦ କରି ଦିଆଯାଉଥିବା ଅଭିଯୋଗ ହୋଇଛି । ସେପଟେ ନୂତନ ଭାବରେ ଟି ରାମପୁର ଠାରେ ନିର୍ମାଣ ହୋଇଥିବା ଫିଡରରୁ ଏହି ଗ୍ରାମ ଗୁଡ଼ିକୁ ବିଦ୍ୟୁତ ସଂଯୋଗ ପାଇଁ ଲୋକେ ବାରମ୍ବାର ଅଭିଯୋଗ କରିଥିଲେ ହେଁ କୌଣସି ସୁଫଳ ନମିଳିବାରୁ ଶେଷରେ ଆନ୍ଦୋଳନକୁ ଓହ୍ଲାଇଛନ୍ତି ଅଞ୍ଚଳବାସୀ ।
ଇଟିଭି ଭାରତ, କଳାହାଣ୍ଡି
