ଭବାନୀପାଟଣା: ଚାକିରିର ପ୍ରଲୋଭନ ଦେଖାଇ ଲକ୍ଷାଧିକ ଟଙ୍କା ହଡପ କରି ଗିରଫ ହେଲେ ଶିକ୍ଷକ। କଳାହାଣ୍ଡି ଜିଲ୍ଲାର ୧୨ ଜଣ ଯୁବକ ଯୁବତୀଙ୍କୁ ବୁର୍ଲା ଏମସିଏଲ କମ୍ପାନୀରେ ଚାକିରି ଦେବା ପାଇଁ ପ୍ରଲୋଭନ ଦେଖାଇ ୬୫ ଲକ୍ଷ ଟଙ୍କା ଠକିନେଇଥିବା ଅଭିଯୋଗ ହୋଇଛି । ଏଥିରେ ପୋଲିସ ଜଣେ ଶିକ୍ଷକଙ୍କୁ ଗିରଫ କରିଛି । ଶିକ୍ଷକ ଜଣଙ୍କ ହେଉଛନ୍ତି, କଳାହାଣ୍ଡି ଜିଲ୍ଲାର ଜୟପାଟଣା ଥାନା ଅନ୍ତର୍ଗତ ଦୁଲକୀବନ୍ଧ ଗ୍ରାମର ଜଣେ ସରକାରୀ ଶିକ୍ଷକ ବିନୀତ ନାୟକ ।
୧୨ ଜଣ ଶିକ୍ଷିତ ଯୁବକ ଯୁବତୀଙ୍କୁ ବୁର୍ଲା ସ୍ଥିତ ଏମସିଏଲ କମ୍ପାନୀରେ ଚାକିରି କରାଇ ଦେବାକୁ ପ୍ରଲୋଭନ ଦେଖାଇଥିଲେ । ଏହାପରେ ସେମାନଙ୍କଠାରୁ ୬୫ ଲକ୍ଷ ଟଙ୍କା ନେଇ 1 ବର୍ଷ ଧରି ଭୁଆଁ ବୁଲାଇ ଆସୁଥିବା ଅଭିଯୋଗ ହୋଇଛି । ଶେଷରେ ନିରାଶ ହୋଇ କୌଣସି ଉପାୟ ନ ପାଇ ୧୨ ଜଣ ଯୁବକ ଯୁବତୀ ଭବାନୀପାଟଣା ଟାଉନ ଥାନାରେ ଲିଖିତ ଅଭିଯୋଗ କରିଥିଲେ ।
ଅଭିଯୋଗ ଆଧାରରେ ପୋଲିସ ତଦନ୍ତ ଆରମ୍ଭ କରିଥିଲା । ଟାଉନ ପୋଲିସର ଏକ ସ୍ୱତନ୍ତ୍ର ଟିମ ଦୁଲକୀବନ୍ଧ ଗ୍ରାମକୁ ଯାଇ ଶିକ୍ଷକ ବିନୀତ ନାୟକଙ୍କୁ ଘରୁ ଉଠାଇ ନେଇଥିଲା । ଏଥିସହ ଅଧିକ ପଚରାଉଚରା ପରେ କୋର୍ଟ ଚାଲାଣ କରିଥିବା ସୂଚନା ମିଳିଛି ।
ଇଟିଭି ଭାରତ, କଳାହାଣ୍ଡି
