ଭବାନୀପାଟଣା: କଳାହାଣ୍ଡି ଜିଲ୍ଲା ପାଇଁ ଦାଦନ ଶବ୍ଦ ଯେମିତି ଦେହସୁହା ହୋଇ ଗଲାଣି, ପ୍ରତି କିଛିଦିନ ବ୍ୟବଧାନରେ ରାଜ୍ୟ ବାହାରୁ ମୃତ ଦାଦନଙ୍କ ଶବ ଗାଁ ମୁହାଁ ହେଉଛି । ପେଟପାଟଣା ପାଇଁ ଯାଇଥିବା ଶ୍ରମିକ ମାନେ କେତବେଳେ ମାଲିକ ଦ୍ୱାରା ନିର୍ଯ୍ୟାତନାର ଶିକାର ହେଉଛନ୍ତି ତ କେତେବେଳେ ଦୁର୍ଘଟଣାରେ ଜୀବନ ହାରୁଛନ୍ତି ।
ଏହିପରି ଦୃଶ୍ୟ ଦେଖିବାକୁ ମିଳିଥିଲା କୋକସରା ବ୍ଲକ ବଡ ପୋଡ଼ାଗୁଡାର ଜଣେ ଯୁବକ ହେମରାଜ ଦୁର୍ଗା ତେଲେଙ୍ଗାନା ହାଇଦ୍ରାବାଦର ଏକ ଠିକାସଂସ୍ଥାରେ ଶ୍ରମିକ ଭାବେ ଘର ନିର୍ମାଣ କାମରେ ନିୟୋଜିତ ଥିଲେ । ସେହି ଯୁବକ ଜଣଙ୍କ ଗତ ୩ ଦିନ ତଳେ ୪ ମହଲା ଛାତ ଉପରୁ ଖସି ପଡିଥିଲେ ।
ଏନେଇ ତାଙ୍କ ସାଥି ଶ୍ରମିକମାନେ ତାଙ୍କୁ ସ୍ଥାନୀୟ ଡାକ୍ତରଖାନା ନେଇ ଭର୍ତ୍ତି କରିଥିଲେ । କିନ୍ତୁ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । କମ୍ପାନୀରେ କାମ କରୁଥିବା ମୃତ ଦାଦନ ଶ୍ରମିକର ବଡଭାଇ କମ୍ପାନୀ ସହାୟତାରେ ଏକ ଆମ୍ବୁଲାନ୍ସରେ ତାଙ୍କୁ ଗାଁକୁ ଆଣି ପହଁଞ୍ଚିବା ପରେ ଗାଁରେ ଶୋକାକୁଳ ପରିବେଶ ଦେଖାଦେଇଛି ।
କଳାହାଣ୍ଡିରୁ ଅଜିତ୍ କୁମାର ସିଂହ, ଇଟିଭି ଭାରତ
