କଳାହାଣ୍ଡି: ପଞ୍ଚାୟତରାଜ ମନ୍ତ୍ରୀ ପ୍ରତାପ ଜେନାଙ୍କ ସ୍ବରରେ ଠକେଇ । ପଞ୍ଚାୟତ ପ୍ରତିନିଧିଙ୍କୁ ଟାର୍ଗେଟ କରି କରୁଥିଲା ଫୋନ । ମନ୍ତ୍ରୀଙ୍କ ପିଏସଓ ସାଜି ଗ୍ରହଣ କରୁଥିଲା ଆତିଥ୍ୟ । ଠକାମୀ ଧରାପଡିବା ପରେ ନର୍ଲା ଥାନାରେ ଅଟକ ରହିଛି ଗଞ୍ଜାମ ଗୋଷାଣୀ ନୂଆଗାଁର ଅଶୋକ ନାଏକ ।
ଖବର ଅନୁଯାୟୀ, ଅଶୋକ ନିର୍ବାଚିତ ଜନ ପ୍ରତିନିଧିଙ୍କୁ ଫୋନ କରି ମନ୍ତ୍ରୀ ପ୍ରତାପ ଜେନା କଥା ହେବେ ବୋଲି କହୁଥିଲା । ଏହାପରେ ନିଜେ ସ୍ବର ବଦଳାଇ ମନ୍ତ୍ରୀଙ୍କ ସ୍ବରରେ କଥା ହେବା ସହ ଅଞ୍ଚଳରେ କାର୍ଯ୍ୟକ୍ରମ ଚୂଡାନ୍ତ କରୁଥିଲା । ହେଲେ କାର୍ଯ୍ୟକ୍ରମ ପୂର୍ବରୁ ନିଜେ ନ ଆସି ପାରି ପିଏସଓ ଯାଉଥିବାର କହୁଥିଲା।
ପରେ ମନ୍ତ୍ରୀଙ୍କ ପିଏସଓ ବେଶରେ ନିଜେ ଆସି ଆତିଥ୍ୟ ଗ୍ରହଣ କରି ମଉଜ କରୁଥିଲା । ତେବେ ଦଶହରା ସମୟରେ ଏପରି ଆତିଥ୍ୟ ଗ୍ରହଣ କରିବାକୁ ଅସିଥିବା ସମୟରେ ତା’ର ଠକାମୀ ଧରାପଡିଥିଲା । ନର୍ଲା ବ୍ଲକ ଅଧ୍ୟକ୍ଷାଙ୍କ ଏକ କାର୍ଯ୍ୟକ୍ରମରେ ଯୋଗଦେବାକୁ ଆସି ଅଶୋକ ଧରାପଡିଥିଲା । ଏହା ପରେ ଲୋକେ ତାକୁ ଉତ୍ତମ ମଧ୍ୟମ ଦେବା ସହ ପୋଲିସ ଜିମାରେ ଦେଇଥିଲେ।
କଳାହାଣ୍ଡିରୁ ଅଜିତ୍ ସିଂହ, ଇଟିଭି ଭାରତ
