କଳାହାଣ୍ଡି: ଦକ୍ଷିଣ ଓ ପଶ୍ଚିମ ଓଡିଶାର ଜିଲ୍ଲାମାନଙ୍କରେ ଜାରି ରହିଛି ବର୍ଷା ବିଭୀଷିକା । ଅତି ପ୍ରବଳ ବର୍ଷାରେ ସୃଷ୍ଟି ହୋଇଛି ବନ୍ୟା ପରିସ୍ଥିତି । ଲଗାଣ ବର୍ଷା ଫଳରେ କଳାହାଣ୍ଡିକୁ ପୁଣି ବନ୍ୟା ଭୟ । ବନ୍ୟା କରାଳ ରୂପ ଧାରଣ କରି ମାଡି ଆସିଛି କଳାହାଣ୍ଡି ଜିଲ୍ଲାକୁ । ଜିଲ୍ଲାର ଜନଜୀବନ ପ୍ରବଳ ମାତ୍ରାରେ ପ୍ରଭାବିତ।
ଦୁଇ ଦିନ ଧରି ଲଗାଣ ବର୍ଷାପରେ ଜିଲ୍ଲାରେ ପ୍ରବାହିତ ଅନେକ ନଦୀର ଜଳସ୍ତର ବୃଦ୍ଧି ପାଇ ବନ୍ୟା ପରିସ୍ଥିତି ସୃଷ୍ଟି ହୋଇଛି । ହାତୀ, ରେତ, ସାନ୍ଦୁଲ, ତେଲନଦୀ ଭଳି ପ୍ରମୁଖ ନଦୀ ଗୁଡିକ ବନ୍ୟା ଜଳରେ ଫୁଲିବାରେ ଲାଗିଛନ୍ତି ।
ବର୍ଷା ଫଳରେ ବନ୍ୟା ବିତ୍ପାତରେ ଜିଲ୍ଲାର କାର୍ଲ୍ଲାମୁଣ୍ଡା ବ୍ଲକର ବିଭିନ୍ନ ଗାଁ ଜଳମଗ୍ନ ହେବା ସହ ତେଲ ଓ ଉଦନ୍ତୀ ନଦୀରେ ବନ୍ୟା ଜଳ ମାଡି ଆସିବାରୁ କାର୍ଲ୍ଲାମୁଣ୍ଡା ଓ ଅମାଠ ମଧ୍ୟରେ ଯୋଗାଯୋଗ ବିଛିନ୍ନ ହୋଇଛି। ସେହିପରି ବେଲଖଣ୍ଡି ଶିବ ମନ୍ଦିର ନିକଟ ତେଲ ନଦୀର ବନ୍ୟା ପାଣି ମାଡି ଆସିବାରୁ ମନ୍ଦିର ଭିତରେ ଥିବା ୨୦ରୁ ଉର୍ଦ୍ଧ୍ବ ଶ୍ରଦ୍ଧାଳୁ ଫସି ରହିଥିବା ସୂଚନା ରହିଛି ।
ଏହି ଲଗାଣ ବର୍ଷା ଯୋଗୁଁ ଜିଲ୍ଲାରେ ୨୦ ହଜାରରୁ ଅଧିକ ଲୋକ ପ୍ରଭାବିତ ହୋଇଥିବା ଜଣାପଡ଼ିଛି । ଏତଦ୍ବ୍ୟତୀତ ଇନ୍ଦ୍ରାବତୀ ଡ୍ୟାମର ୫ଟି ଗେଟ୍ ଖୋଲା ଯାଇଛି। ଫଳରେ ବନ୍ୟା ଆଶଙ୍କା ବଢିବାରେ ଲାଗିଛି ।
ବନ୍ୟା ଓ ପ୍ରବଳ ବର୍ଷାକୁ ନଜରରେ ରଖି ପଶ୍ଚିମ ଓଡିଶାର ତିନୋଟି ଜିଲ୍ଲାରେ ସମସ୍ତ ସ୍କୁଲ ଓ କଲେଜକୁ ଛୁଟି ଘୋଷଣା କରାଯାଇଛି । କଳାହାଣ୍ଡି, ବରଗଡ ଓ ନୂଆପଡା ଜିଲ୍ଲାପାଳ ଆଜି ଜିଲ୍ଲାର ସମସ୍ତ ସ୍କୁଲ ଓ କଲେଜ ବନ୍ଦ ଘୋଷଣା କରାଯାଇଛି ।
କଳାହାଣ୍ଡିରୁ ଅଜିତ ସିଂ, ଇଟିଭି ଭାରତ
