ଭବାନୀପାଟଣା : କେନ୍ଦୁପତ୍ର ଚୋରି ରାକେଟର ପର୍ଦ୍ଦାଫାସ ହୋଇଛି । ଏ ଘଟଣାରେ ପୋଲିସ ୭ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି । ଏନେଇ ଅଧିକ ତଦନ୍ତ ଜାରି ରଖିଛି ପୋଲିସ । ସୂଚନା ଅନୁସାରେ, କଳାହାଣ୍ତି ଜିଲ୍ଲା ମଦନପୁର ରାମପୁର ଥାନା ଅନ୍ତର୍ଗତ ଏକାତରା କେନ୍ଦୁପତ୍ର ଫଡ଼ିରେ କିଛି ଦୁର୍ବୃତ୍ତ ମାରଣାସ୍ତ୍ର ଦେଖାଇ ଏକ ଟ୍ରକ ସାହାଯ୍ୟରେ ୪୦ ବସ୍ତା ଓ ତିନିବଣ୍ତଲ କେନ୍ଦୁପତ୍ର ଚୋରି କରିଥିଲେ । ଗତ ୨୯ ତାରିଖ ବିଳମ୍ବିତ ରାତିରେ ଏହି ଘଟଣା ଘଟିଥିଲା । ଏନେଇ ବନ ବିଭାଗ ପକ୍ଷରୁ ଥାନାରେ ଅଭିଯୋଗ ହୋଇଥିଲା। ଆଉ ଅଭିଯୁକ୍ତ ମାନଙ୍କୁ ଧରିବା ପାଇଁ ବ୍ଲୁପ୍ରିଣ୍ଟ ପ୍ରସ୍ତୁତ କରିଥିଲା ପୋଲିସ।
କଳାହାଣ୍ଡି ଏସପି ଶ୍ରବନ ବିବେକଙ୍କ ନିର୍ଦ୍ଦେଶ କ୍ରମେ ଏକ ସ୍ୱତନ୍ତ୍ର ଟିମ ଗଠନ କରିବା ସହ ତଦନ୍ତକୁ ଜୋରଦାର କରାଯାଇଥିଲା । କେନ୍ଦୁପତ୍ର ଲୁଟ ଘଟଣାର ମାଷ୍ଟର ମାଇଣ୍ଡ ମହମ୍ମଦ ଖୁର୍ସିଦ ଅଲ୍ଲୀଙ୍କ ସମେତ ୭ ଜଣିଆ ଡ଼କାୟତ ଗ୍ୟାଙ୍ଗକୁ ଗିରଫ କରିଥିଲା ପୋଲିସ । ଗ୍ୟାଙ୍ଗ ବିଭିନ୍ନ ସମୟରେ କେନ୍ଦୁପତ୍ର ଲୁଟ କରି ପଶ୍ଚିମବଙ୍ଗକୁ ଚୋରା ଚାଲାଣ କରୁଥିବା ବେଳେ ବେଆଇନ ବିଡ଼ି ତିଆରି କରି ବିକ୍ରି କରୁଥିବା ସୂଚନା ଦେଇଛନ୍ତି କଳାହାଣ୍ଡି ଏସପି।
କଳାହାଣ୍ତିରୁ ଅଜିତ ସିଂ,ଇଟିଭି ଭାରତ
