ଝାରସୁଗୁଡା: ଲକଡାଉନ ଯୋଗୁଁ ଦେଶର ବିଭିନ୍ନ ସ୍ଥାନରେ ଅଟକି ରହିଥିବା ଶ୍ରମିକମାନଙ୍କ ସମେତ ତୀର୍ଥଯାତ୍ରୀ, ପର୍ଯ୍ୟଟକ, ଛାତ୍ରଛାତ୍ରୀ ଓ ଅନ୍ୟ ବ୍ୟକ୍ତିଙ୍କୁ ରାଜ୍ୟ ଫେରାଇ ଆଣିବା ପାଇଁ କେନ୍ଦ୍ର ମନ୍ତ୍ରଣାଳୟରୁ ମିଳିଛି ଅନୁମତି । ଏହି କ୍ରମରେ ସେମାନଙ୍କ ପରିବହନ ପାଇଁ ମେ ମାସ 1 ତାରିଖରୁ ଶ୍ରମିକଙ୍କ ପାଇଁ ଆରମ୍ଭ ହୋଇଛି ସ୍ବତନ୍ତ୍ର ଟ୍ରେନ । ଏନେଇ ତେଲେଙ୍ଗାନା ସରକାରଙ୍କ ଅନୁରୋଧ କ୍ରମେ ତେଲେଙ୍ଗାନା ଲିଙ୍ଗମପଲ୍ଲୀରୁ ଝାଡଖଣ୍ଡ ହଟିଆକୁ ଗଡିଛି ସ୍ବତନ୍ତ୍ର ଟ୍ରେନ । ଶୁକ୍ରବାର କଡା ସୁରକ୍ଷା ବ୍ୟବସ୍ଥା ମଧ୍ୟରେ ସ୍ବତନ୍ତ୍ର ଟ୍ରେନଟି ଝାରସୁଗୁଡା ଷ୍ଟେସନରେ ରାତି 8ଟା 01 ମିନିଟରେ ପହଞ୍ଚି ମାତ୍ର ଦୁଇ ମିନିଟର ରହଣୀ ପରେ ପୁଣି ଝାଡଖଣ୍ଡ ଅଭିମୁଖେ ବାହାରିଛି ।
ଏହି ସ୍ବତନ୍ତ୍ର ଟ୍ରେନରେ 1225 ପ୍ରବାସୀ ଦାଦନ ଶ୍ରମିକ ହଟିଆ ଅଭିମୁଖେ ଯାତ୍ରା କରୁଛନ୍ତି । ତେଣେ ରାଜ୍ୟ ସରକାରଙ୍କମାନଙ୍କ ଅନୁରୋଧକ୍ରମେ ଏହି ଟ୍ରେନ ଗୋଟିଏ ରାଜ୍ୟରୁ ସିଧାସଳଖ ଭାବେ ଯାତ୍ରୀଙ୍କୁ ନେଇ ଆଉ ଗୋଟିଏ ରାଜ୍ୟକୁ ଯିବ । ଫସି ରହିଥିବା ଶ୍ରମିକଙ୍କୁ ଏଭଳି ପରିବହନ ପାଇଁ ସ୍ବତନ୍ତ୍ର ନିୟମ ପ୍ରସ୍ତୁତ ହୋଇଛି । ଯାତ୍ରା ସମୟରେ ପ୍ରତ୍ୟେକ ଯାତ୍ରୀ ମାସ୍କ ପିନ୍ଧିବା ବାଧ୍ୟତା ମୂଳକ ହୋଇଥିବା ବେଳେ ସେମାନଙ୍କ ପାଇଁ ଷ୍ଟେସନମାନଙ୍କରେ ଖାଦ୍ୟ ଓ ପାନୀୟଜଳର ବ୍ୟବସ୍ଥା ରହିବ ।
ରେଳବାଇ ପକ୍ଷରୁ ସାମାଜିକ ଦୂରତ୍ବ ଓ ପରିଷ୍କାର ପରିଚ୍ଛନ୍ନତା ଉପରେ ଗୁରତ୍ବ ଦିଆଯିବା ସହିତ ଦୂର ଯାତ୍ରା କରୁଥିବା ଯାତ୍ରୀମାନଙ୍କୁ ବାଟରେ ଖାଦ୍ୟ ଯୋଗାଇ ଦିଆଯିବ । ଶ୍ରମିକମାନେ ସେମାନଙ୍କ ଗନ୍ତବ୍ୟସ୍ଥଳରେ ପହଞ୍ଚିବା ପରେ ସମ୍ପୃକ୍ତ ରାଜ୍ୟ ସରକାର ପରୀକ୍ଷା ନିରୀକ୍ଷା ଏବଂ କ୍ବାରେଣ୍ଟାଇନ ବ୍ୟବସ୍ଥା କରିବା ନେଇ ଯୋଜନା ରହିଛି ।
ଝାରସୁଗୁଡାରୁ ରବି ନାରାୟଣ ସାହୁ, ଇଟିଭି ଭାରତ
