ଝାରସୁଗୁଡା: ଥମୁନି ଡିଏଭି ସ୍କୁଲ୍ ଫି ବୃଦ୍ଧି ପ୍ରସଙ୍ଗ । ଯାହାକୁ ନେଇ ଅଭିଭାବକ ମହଲରେ ଅସନ୍ତୋଷ ଦେଖିବାକୁ ମିଳିଛି। ଝାରସୁଗୁଡା ଜିଲ୍ଲାରେ ଥିବା ବ୍ରଜରାଜନଗର ଓ ଲଖନପୁର ଖଣି ଅଞ୍ଚଳରେ ଥିବା 3ଟି ଡ଼ିଏଭି ସ୍କୁଲରେ ଏମସିଏଲ୍ କର୍ମଚାରୀ ପିଲାଙ୍କ ଫି ପ୍ରାୟ ୮ ଶହ ଟଙ୍କା ହୋଇଥିବା ବେଳେ ଅନ୍ୟ ପିଲାଙ୍କ ସ୍କୁଲ୍ ଫି ପ୍ରାୟ ତିନି ଗୁଣା ବୃଦ୍ଧି କରାଯାଇଛି । ଯାହାକୁ ନେଇ ସାଧାରଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି।
ତେବେ ଡ଼ିଏଭି ସ୍କୁଲରେ ଅଣ ଏମସିଏଲ ପିଲାଙ୍କ ଫି ବୃଦ୍ଧି ପ୍ରସଙ୍ଗରେ ବ୍ରଜରାଜନଗର ବିଧାୟକ କିଶୋର ମହାନ୍ତି ସ୍କୁଲ କମିଟି ଏବଂ ଏମସିଏଲ ଅଧିକାରୀଙ୍କ ସହ ବୈଠକ କରିଛନ୍ତି । ଏହାସହ ସ୍କୁଲ ଫି କିପରି ହ୍ରାସ କରାଯିବ ଏବଂ ସାଧାରଣ ଓ ଏମସିଏଲ କର୍ମଚାରୀ ପିଲାଙ୍କ ସ୍କୁଲ ଫି ସମାନ ରଖାଯିବ ସେନେଇ ସେ ଆଲୋଚନା କରିଛନ୍ତି ।
ଅନ୍ୟପଟେ ବ୍ରଜରାଜନଗରର ପୂର୍ବତନ ବିଧାୟିକା ରାଧାରାଣୀ ପଣ୍ଡା ଫି ବୃଦ୍ଧି ବିରୋଧରେ ଏମସିଏଲ ଈବ ଭ୍ୟାଲି ଅଧୀନରେ ଥିବା ଡିଏଭି ପବ୍ଲିକ୍ ସ୍କୁଲର ସମ୍ମୁଖରେ ଧାରଣା ଦେଇଛନ୍ତି । ଫି ବୃଦ୍ଧିକୁ ନେଇ ଅଞ୍ଚଳରେ ଅସନ୍ତୋଷର ଦାନା ବାନ୍ଧୁ ଥିବାବେଳେ ଏ ପ୍ରସଙ୍ଗରେ ଏମସିଏଲ ଅଧିକାରୀ କୌଣସି ପ୍ରତିକ୍ରିୟା ଦେବାକୁ ମନା କରିଛନ୍ତି।
ଅନ୍ୟପଟେ ସ୍କୁଲ ଫି ବାବଦରେ ଆମେ ହସ୍ତକ୍ଷେପ କରିବୁ ନାହିଁ ଏମସିଏଲର ନିଷ୍ପତ୍ତି କ୍ରମେ ସ୍କୁଲ ଫି ହ୍ରାସ କରାଯିବ ବନ୍ଧବାହାଲ ସ୍ଥିତ ଡ଼ିଏଭି ପ୍ରିନ୍ସସିପାଲ ଏକେ ମିଶ୍ର କହିଛନ୍ତି । ଗୋଟିଏ ପଟେ ଏମସିଏଲର କୋଇଲା ଖଣି ପାଇଁ ସମଗ୍ର ବ୍ରଜରାଜନଗର ବାସୀ ପ୍ରଭାବିତ ହୋଇଛନ୍ତି । ବର୍ତ୍ତମାନ ସ୍କୁଲର ଶିକ୍ଷା ବ୍ୟବସ୍ଥା ଏମସିଏଲର ସାମାଜିକ ଦାୟିତ୍ବବୋଧ ବୋଲି ଅଭିଭାବକ ଦାବି କରିଛନ୍ତି । ଫି ବୃଦ୍ଧିକୁ ନେଇ ଅସନ୍ତୋଷ ଦେଖାଦେଇଥିବା ବେଳେ ଏହାକୁ ନେଇ ରାଜନୀତି ମଧ୍ୟ ଜୋର ଧରିଛି । ତେବେ ଏମସିଏଲର ଉଚ୍ଚ କର୍ତ୍ତୃପକ୍ଷ ଏହି ବିବାଦର ସମାଧାନ କେବେ କରୁଛନ୍ତି ତାହା ଦେଖିବାକୁ ବାକି ରହିଲା ।
ଝାରସୁଗୁଡାରୁ ରବି ନାରାୟଣ ସାହୁ, ଇଟିଭି ଭାରତ
