ଝାରସୁଗୁଡ଼ା: ଜିଲ୍ଲା ମୁଖ୍ୟ ଡାକ୍ତରଖାନା ରାସ୍ତାରେ ଭାରିଯାନ ଚଳାଚଳକୁ ବିରୋଧ କରିଛି ବିଜେପି । ଏନେଇ ସ୍ଥାନୀୟ ବିଜେପି ନେତା ଦିନେଶ ଜୈନଙ୍କ ନେତୃତ୍ତ୍ବରେ ଶତାଧିକ ବିଜେପି କର୍ମୀ ରାସ୍ତା ଅବରୋଧ କରିଥିଲେ । ଫଳରେ ରାସ୍ତାରେ ସମସ୍ତ ଭାରିଯାନ ଚଳାଚଳ ବନ୍ଦ ରହିଥିଲା ।
ବିଜେପି ଅଭିଯୋଗ କରିଛି ଯେ, ଡାକ୍ତରଖାନା ରାସ୍ତାରେ ଶିଳ୍ପାନୁଷ୍ଠାନ ପାଇଁ ଭାରିଯାନ ଚଳାଚଳ କରୁଥିବାରୁ ରାସ୍ତାଟି ଖାଲଖମାରେ ପରିଣତ ହୋଇଛି । ଫଳରେ ଡ଼ାକ୍ତରଖାନାକୁ ରୋଗୀ ଓ ଆମ୍ବୁଲାନ୍ସ ଯାତାୟତରେ ବାଧା ସୃଷ୍ଟି ହେଉଛି । ବହୁ ସମୟରେ ଦୁର୍ଘଟଣାରେ ରୋଗୀ ଓ ସମ୍ପର୍କୀୟମାନେ ମୃତାହତ ହେଉଛନ୍ତି । ତୁରନ୍ତ ରାସ୍ତା ମରାମତି ସହିତ ଡାକ୍ତରଖାନା ପାଇଁ ସ୍ବତନ୍ତ୍ର ରାସ୍ତା ନିର୍ମାଣ ପାଇଁ ଦଳ ତରଫରୁ ବାରମ୍ବାର ଦାବି କରାଯାଇ ଆସୁଛି । ମାତ୍ର ପ୍ରଶାସନ ସମେତ PWD କର୍ତ୍ତୃପକ୍ଷ ଦୀର୍ଘଦିନ ହେଲା ଅବହେଳା ପ୍ରଦର୍ଶନ କରୁଛନ୍ତି ।
ବାରମ୍ବାର ଦାବି ସତ୍ତ୍ବେ ରାସ୍ତା ମରାମତି କରାଯାଉ ନଥିବାରୁ ଆଜି ଜିଲ୍ଲା ପୋଲିସ କାର୍ଯ୍ୟାଳୟ ସମ୍ମୁଖ ଦେଇ ଚିକିତ୍ସାଳୟକୁ ଯାଇଥିବା ରାସ୍ତା ଅବରୋଧ କରାଯାଇଥିଲା । ସମସ୍ତ ପ୍ରକାର ଭାରିଯାନକୁ ଛଡ଼ାଯାଇ ନଥିଲା । ଶାନ୍ତିଶୃଙ୍ଖଳା ରକ୍ଷା ପାଇଁ ବ୍ୟାପକ ପୋଲିସ ମୁତୟନ କରଯାଇଥିଲା । ଝାରସୁଗୁଡ଼ା ଏସଡିପିଓ କୈଳାସ ଆଚାର୍ଯ୍ୟ, ଝାରସୁଗୁଡ଼ା ଥାନା ଅଧିକାରୀ ସାବିତ୍ରୀ ବଳ ସଦଳ ବଳ ପହଞ୍ଚି ବୁଝାସୁଝା କରିଥିଲେ । ଉପଜିଲ୍ଲାପାଳ ସିବା ଟପ୍ପୋ , ପୂର୍ତ୍ତ ବିଭାଗ ନିର୍ବାହୀ ଯନ୍ତ୍ରୀ ପ୍ରଦୀପ୍ତ ନାଥ ପହଞ୍ଚି ରାସ୍ତା ମରାମତି ପାଇଁ ପ୍ରତିଶ୍ରୁତି ଦେଇଥିଲେ । ଫଳରେ ରାସ୍ତା ଅବରୋଧ ପ୍ରତ୍ୟାହୃତ ହୋଇଛି ।
ଝାରସୁଗୁଡାରୁ ରବି ନାରାୟଣ ସାହୁ, ଇଟିଭି ଭାରତ
