ଯାଜପୁର: ବହୁ ଚର୍ଚ୍ଚିତ ହରିଦାସପୁର ପଞ୍ଚାୟତ ପିଇଓ ସ୍ମିତାରାଣୀ ବିଶ୍ବାଳ ମୃତ୍ୟୁ ଘଟଣାରେ ଜିଲ୍ଲା ପ୍ରଶାସନ ପକ୍ଷରୁ ନିଆଯାଇଛି ଏକ ବଳିଷ୍ଠ ପଦକ୍ଷେପ । ସ୍ମିତାରାଣୀ ମୃତ୍ୟୁ ଘଟଣାର ପ୍ରାୟ 4 ମାସ ପରେ ପ୍ରଶାସନ ଦ୍ବାରା ଭଙ୍ଗାଯାଇଛି ରୁପେସ ଭଦ୍ରଙ୍କ ଅତିଥିଶାଳା । ଯାହା ଥିଲା ସ୍ମିତାରାଣୀଙ୍କ ରହସ୍ୟ ଜନକ ମୃତ୍ୟୁର ମୁକସାକ୍ଷୀ । ଜିଲ୍ଲା ପ୍ରଶାସନ ସ୍ଥାନୀୟ ଧର୍ମଶାଳା ତହସିଲ ଏବଂ ପୋଲିସ ପ୍ରଶାସନର ବରିଷ୍ଠ ଅଧିକାରୀଙ୍କ ସହଯୋଗରେ ଆରମ୍ଭ କରିଥିଲା ଭଙ୍ଗାରୁଜା କାମ । ବୁଲଡୋଜର ଓ ହାଇଡ୍ରା ସହାୟତାରେ ଭଙ୍ଗାଯାଇଥିଲା ଦୁଇ ମହଲା କୋଠା । ପ୍ରଥମେ ସରପଞ୍ଚ ଓ ତାଙ୍କ ସମର୍ଥକଙ୍କ ଦ୍ଵାରା ଏହାକୁ ବିରୋଧ କରାଯାଇଥିଲେ ହେଁ ଏହାକୁ ଭ୍ରୁକ୍ଷେପ ନକରି ପ୍ରଶାସନ ପକ୍ଷରୁ ନିଆଯାଇଥିଲା କଠୋର ପଦକ୍ଷେପ ।
ଯେଉଁ ଘରେ ସ୍ମିତାରାଣୀଙ୍କ ମୃତ୍ୟୁ ହୋଇଥିଲା ସେହି ଗେଷ୍ଟହାଉସକୁ ପ୍ରଶାସନ ପ୍ରଥମେ ନିଜ ଅକ୍ତିଆରକୁ ନେଇଥିଲା । ପରେ ତାକୁ ଭାଙ୍ଗିବା ପାଇଁ ଉଦ୍ୟମ ଆରମ୍ଭ ହୋଇଥିଲା । ପ୍ରଥମେ ଅଭିଯୁକ୍ତ ରୁପେସଙ୍କ ପତ୍ନୀ ତଥା ହରିଦାସପୁର ପଞ୍ଚାୟତର ସରପଞ୍ଚ ମଧୁସ୍ମିତା ଭଦ୍ର ତାଙ୍କ ସମର୍ଥକଙ୍କ ସହ ମିଶି ଏହାକୁ ତୀବ୍ର ବିରୋଧ କରିଥିଲେ । ସରପଞ୍ଚ ଉପସ୍ଥିତ ଅଧିକାରୀମାନଙ୍କୁ ଏକ କୋର୍ଟ ଷ୍ଟେ ଅର୍ଡର ମଧ୍ୟ ଦେଖାଇଥିଲେ । ତେବେ ତାକୁ ଅଣଦେଖା କରି ପ୍ରଶାସନ ଭଙ୍ଗାରୁଜା କାମରେ ଲାଗିପଡିଥିଲା । ପୋଲିସ ଓ ପ୍ରଶାସନିକ ଅଧିକାରୀ ସେଠାରୁ ଲୋକଙ୍କୁ ଘଉଡାଇବା ସହ ଆଇନଗତଃ ଏହା ଭଙ୍ଗାଯିବ ବୋଲି ସେମାନଙ୍କୁ ଦର୍ଶାଇଥିଲେ । ଘଟଣାସ୍ଥଳରେ ବରିଷ୍ଠ ଅଧିକାରୀଙ୍କ ସହ ଅନ୍ୟାନ୍ୟ କର୍ମଚାରୀମାନେ ନିୟୋଜିତ ଥିଲେ । ତେବେ କଳେବଳେ କୌଶଳ ପ୍ରୟୋଗ କରି ପ୍ରଶାସନ ଏହାକୁ ଭାଙ୍ଗିବାକୁ ସକ୍ଷମ ହୋଇଥିଲା । ଗେଷ୍ଟ ହାଉସକୁ କେତେକ ରଙ୍ଗଶାଳାର ଆଖ୍ୟା ଦେଇଥିବାବେଳେ ମଧୁସ୍ମିତା ଭଦ୍ର ଏହାର ନିନ୍ଦା କରିଥିଲେ ଏବଂ ତାଙ୍କ ପ୍ରତି ଅନ୍ୟାୟ ହୋଇଛି ବୋଲି କହିଥିଲେ ।
ଏହି ଅପରେସନରେ 3 ପ୍ଲାଟୁନ ପୋଲିସ ଫୋର୍ସ ମୁତୟନ ହେବା ସହ ଉପଜିଲ୍ଲାପାଳ ନାରାୟଣ ଚନ୍ଦ୍ର ଧଳ, ଅତିରିକ୍ତ ଜିଲ୍ଲାପାଳ ମିହିର ପ୍ରସାଦ ମହାନ୍ତି, ଅତିରିକ୍ତ ଏସପି ରାଜକିଶୋର ଦୋରା ଓ ଭବାନୀ ପ୍ରସାଦ ପଟ୍ଟନାୟକ, ଏସଡିପିଓ ଚିନ୍ମୟ କୁମାର ନାୟକ, ଧର୍ମଶାଳା ତହସିଲଦାର ସରୋଜ କୁମାର ପଣ୍ଡା, ବଡଚଣା, କୁଆଖିଆ ଏବଂ ଜେନାପୁର ଥାନା ଅଧିକାରୀ ମାନେ ଉପସ୍ଥିତ ରହିଥିଲେ । ମୋଟମୋଟି ଭାବେ ଶାନ୍ତିଶୃଙ୍ଖଳା ମଧ୍ୟରେ ଶେଷ ହୋଇଥିଲା ଭଙ୍ଗାରୁଜା ଓ ଜବର ଦଖଲ ଉଚ୍ଛେଦ କାର୍ଯ୍ୟ । ଲମ୍ବା ଦିନର ପ୍ରତୀକ୍ଷା ପରେ ଶୁକ୍ରବାର ଏହାର ଯବନିକା ପଡିଛି । ଆସନ୍ତା 14ରେ ବଜେଟ ଅଧିବେଶନ ଥିବା ବେଳେ ସେତେବେଳେ କୌଣସି ପ୍ରଶ୍ନବାଣର ଶରବ୍ୟ ନହେବାକୁ ଏଥିପୂର୍ବରୁ କାମ ସାରିଦେଇଛି ପ୍ରଶାସନ । ଯାହା ଚାରିଆଡେ ଚର୍ଚ୍ଚାର ବିଷୟ ପାଲଟିଛି ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
