ଯାଜପୁର: ଉଦ୍ଯାପିତ ହୋଇଯାଇଛି ୩୪ତମ ଓଡିଶା ଷ୍ଟେଟ୍ ତାଇକୋଣ୍ଡୋ ଚମ୍ପିଆନସିପ । ଯାଜପୁରର ଜାରକା ଷ୍ଟାଡିୟମରେ ୩ଦିନ ଧରି ଚାଲିଥିବା ଏହି ପ୍ରତିଯୋଗିତାରେ ଭୁବନେଶ୍ବର ଦଳ ଚମ୍ପିଆନ ହୋଇଛି । ସେହିପରି କେନ୍ଦ୍ରାପଡା ଦଳ ରନର୍ସଅପ ହୋଇଥିବାବେଳେ କେନ୍ଦୁଝର ଦଳ ତୃତୀୟ ସ୍ଥାନରେ ରହିଛି । ସବ୍ଜୁନିୟର, ଜୁନିୟର, ସିନିୟର ବାଳକ, ବାଳିକା ବିଭାଗରେ ଭୁବନେଶ୍ବର ସର୍ବାଧିକ ପଏଣ୍ଟ ହାସଲ କରି ଚମ୍ପିଆନ ହୋଇଛି।
ଏହି ପ୍ରତିଯୋଗିତାରେ ରାଜ୍ୟର ୨୭ଟି ଜିଲ୍ଲାରୁ ୫୪୬ ଜଣ ପ୍ରତିଯୋଗୀ ଅଂଶଗ୍ରହଣ କରିଥିଲେ । ବିଭିନ୍ନ ବର୍ଗରେ ୩୪୦ଜଣ ବାଳକ ଓ ୨୦୬ଜଣ ବାଳିକା ଭାଗ ନେଇଥିଲେ। ଏହି ପ୍ରତିଯୋଗିତାକୁ ୨୦ଜଣ ଅଫିସିଆଲ ପରିଚାଳନା କରିଥିଲେ ।
କେନ୍ଦୁଝର ବିଧାୟକ ତଥା ବିରୋଧୀ ଦଳ ମୁଖ୍ୟ ସଚେତକ ମୋହନ ଚରଣ ମାଝୀ ମୁଖ୍ୟ ଅତିଥି ଭାବେ ଯୋଗଦେଇ ଚମ୍ପିଆନ୍ ଓ ରନର୍ସଅପ ଦଳକୁ ଟ୍ରଫି ପ୍ରଦାନ କରିଥିଲେ। ଏଥିସହ କୃତି ପ୍ରତିଯୋଗୀଙ୍କୁ ପୁରସ୍କୃତ ମଧ୍ୟ କରିଥିଲେ । ଏହି କାର୍ଯ୍ୟକ୍ରମରେ ଅତିଥିଭାବେ ରାଜ୍ୟ ସାଧାରଣ ସମ୍ପାଦକ ସନ୍ତୋଷ କୁମାର ମହାନ୍ତି, ଯାଜପୁର ଜିଲ୍ଲା ତାଇକୋଣ୍ଡୋ ଆସୋସିଏସନ ସଭାପତି ସମୀର କୁମାର ମହାନ୍ତି ଓ ସମ୍ପାଦକ ଅଶ୍ବନୀ କୁମାର ମହାନ୍ତି ଯୋଗ ଦେଇଥିଲେ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
