ଯାଜପୁର: ୫୩ ନମ୍ବର ଜାତୀୟ ରାଜପଥରେ ମର୍ମନ୍ତୁଦ ସଡକ ଦୁର୍ଘଟଣା । ଭାରସାମ୍ୟ ହରାଇ ସ୍କୁଟି ଉପରେ ଓଲଟି ପଡିଲା ଟ୍ରକ । ଫଳରେ ମାଆ ଝିଅଙ୍କର ମୃତ୍ୟୁ ହୋଇଛି । ଯାଜପୁର ବରଡ଼ା ଛକ ନିକଟରେ ଘଟିଛି ଏଭଳି ମର୍ମନ୍ତୁଦ ଦୁର୍ଘଟଣା ।ତେବେ ବାପାଙ୍କ ଶୁଦ୍ଧିକ୍ରିୟା ସାରି ଫେରିଲା ବେଳେ ମାଆ ଝିଅଙ୍କ ମୃତ୍ୟୁ ଘଟିଛି । ଶୁଦ୍ଧିକ୍ରିୟା ସାରି ମହାକାଳପଡ଼ାରୁ ସୁକିନ୍ଦା ଫେରିଲା ବେଳେ ଦୁର୍ଘଟଣା ।
ସୂଚନାଅନୁସାରେ, ୨ଜଣ ସ୍କୁଟର ଆରୋହୀ କେନ୍ଦ୍ରାପଡା ଜିଲ୍ଲା ମହାକାଳପଡ଼ା ଅଞ୍ଚଳରୁ ସୁକିନ୍ଦା ଅଭିମୁଖେ ଯାଉଥିବା ସମୟରେ ବରଡ଼ା ଛକ ନିକଟରେ ଏକ ଦଶ ଚକିଆ ଟ୍ରକ ଭାରସାମ୍ୟ ହରାଇ ସେମାନଙ୍କ ଉପରେ ଓଲଟି ପଡିଥିଲା। ଘଟଣାସ୍ଥଳରେ ହିଁ ମା ଝିଅ ମୃତ୍ୟୁ ହୋଇଥିଲା । ମୃତ ମାଆ ଶ୍ରୁତିକା ଚକ୍ରବର୍ତ୍ତି ଓ ଝିଅ ଲିପିକା ଚକ୍ରବର୍ତ୍ତି ହୋଇଥିବା ବେଳେ ସେମାନଙ୍କ ଘର ସୁକିନ୍ଦା ହୋଇଥିବା ନେଇ ସୂଚନା ରହିଛି । ଖବରପାଇ ଜେନାପୁର ପୋଲିସ ମୃତଦେହକୁ ଜବତ କରିବା ସହ ତଦନ୍ତ ଆରମ୍ଭ କରିଛି ।
ଇଟିଭି ଭାରତ, ଯାଜପୁର
