ଯାଜପୁର: ନିଖୋଜ ବ୍ୟକ୍ତିଙ୍କ ମୃତଦେହ ଉଦ୍ଧାର । ଯାଜପୁର ସହର ଥାନା ମଙ୍ଗଳପୁର ନିକଟରେ ବୈତରିଣୀର ଶାଖା ବୁଡା ନଦୀରେ ଗତକାଲିଠାରକୁ ନିଖୋଜ ଥିବା ଅଧ୍ୟାପକ ନିହାର ପ୍ରସାଦ ନାୟକଙ୍କ ମୃତଦେହ ଉଦ୍ଧାର ହୋଇଛି ।
କଳିନ୍ଦ୍ରାବାଦ ଅଞ୍ଚଳର ବାଲିଘାଟ ନିକଟରେ ଅଧ୍ୟାପକଙ୍କ ମୃତଦେହ ଭାସୁଥିବା ଦେଖି ଓଡ୍ରାଫ ବାହିନୀକୁ ଖବର ଦେଇଥିଲେ ସ୍ଥାନୀୟ ଲୋକ । ଓଡ୍ରାଫ ଟିମ ସହାୟତାରେ ମୃତଦେହକୁ ଉଦ୍ଧାର କରାଯାଇଥିଲା । ମୃତଦେହ ଉଦ୍ଧାର ପରେ ବ୍ୟବଚ୍ଛେଦ ପାଇଁ ଯାଜପୁର ଜିଲା ମୁଖ୍ୟ ଚିକିତ୍ସାଳୟକୁ ପଠାଯାଇଛି ।
ଗତକାଲି ନିହାରଙ୍କ ସାନ ଭାଇ ଶୁଦ୍ଧିକ୍ରିୟାରେ ଯୋଗ ଦେବା ସମୟରେ ନଦୀରେ ବୁଡି ଯାଇଥିଲେ । ତାଙ୍କୁ ଉଦ୍ଧାର କରିବାକୁ ଯାଇ ନିହାର ମଧ୍ୟ ବୁଡିଯାଇଥିଲେ । ଗତକାଲି ଗ୍ରାମବାସୀ ଓ ଅଗ୍ନିଶମ ଏବଂ ଓଡ୍ରାଫ ବାହିନୀ ଖୋଜାଖୋଜି କରି ବିଫଳ ହୋଇଥିଲେ । ନିହାର କେନ୍ଦ୍ରାପଡା ସ୍ବୟଂଶାସିତ ମହାବିଦ୍ୟାଳୟରେ ଅଧ୍ୟାପକ ଭାବେ କାର୍ଯ୍ୟ କରୁଥିଲେ । ତାଙ୍କ ବିୟୋଗରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା,ଇଟିଭି ଭାରତ
