ଯାଜପୁର: ଦୀର୍ଘ 9 ଦିନର ଲୁଚକାଳି ପରେ ଧରାପଡିଲା ନରହନ୍ତା ଦନ୍ତା । ଯାଜପୁର ଜିଲ୍ଲାରେ ଆତଙ୍କ ଖେଳାଇଥିବା ଦନ୍ତାକୁ ଧରିଲା ଡ୍ରୋନ । 12 ଘଣ୍ଟାର ଅପରେସନ ପରେ ହାତୀକୁ କାବୁ କରିବାରେ ସଫଳ ହୋଇଛି ବନବିଭାଗ ।
ନନ୍ଦନକାନନ, ଶିମିଳିପାଳ, କେନ୍ଦୁଝର ଓ ଅନୁଗୋଳ ଅଞ୍ଚଳରୁ ବିଶେଷଜ୍ଞ ଦଳ ଆସି ଆରମ୍ଭ କରିଥିଲେ ହାତୀ ଧରା ଅପରେସନ । ଗଜରାଜକୁ କାବୁ କରିବା ପାଇଁ ବ୍ୟବହାର ହୋଇଥିଲା ଡ୍ରୋନ କ୍ୟାମେରା ଓ ଟ୍ରାଙ୍କୁଲାଇଜର । ଶେଷରେ ଧୂଳିଗଡ଼ ଜଙ୍ଗଲରେ ହାତୀ ଥିବା ଜାଣିପାରି ତା ଉପରେ ପ୍ରୟୋଗ କରାଯାଇଥିଲା ନିସ୍ତେଜକ । ଆଉ ଦାନଗଦୀ ବ୍ଲକ ଗଣ୍ଟିପୁର ଗାଁରୁ ଜେସିବି ସାହାଯ୍ୟରେ ଉଦ୍ଧାର ହେଲା ଦନ୍ତା ।
9 ଦିନ ଧରି ଦନ୍ତା ଆତଙ୍କରେ ଆତଙ୍କିତ ଥିଲେ ଜିଲ୍ଲାର ଦାନଗଦୀ, କୋରାଇ ଓ ରସୁଲପୁର ବ୍ଲକର ଅଧିକାଂଶ ଗାଁ । କେତେବେଳେ ଘର ଭାଙ୍ଗିଲା ତ ଫସଲ ନଷ୍ଟ କରୁଥିଲା ନରହନ୍ତା ଦନ୍ତା । ସେହିପରି 4 ଜଣଙ୍କୁ ଦଳି ମାରି ଦେଇଥିବାବେଳେ 10 ଜଣଙ୍କୁ ଘାଇଲା କରିଥିଲା । ବନବିଭାଗକୁ ନାକେଦମ କରିବା ସହ ଧରା ଦେଉନଥିଲା ଦନ୍ତା । ଏଥିଯୋଗୁଁ ସ୍କୁଲ କଲେଜ ଛୁଟି ଘୋଷଣା କରିବାକୁ ବାଧ୍ୟ ହୋଇଥିଲେ ଜିଲ୍ଲାପାଳ ।
ବନବିଭାଗର ମାରାଥନ ମିଶନ ପରେ ଶେଷରେ ଟ୍ରାଙ୍କୁଲାଇଜ ହୋଇଛି ନରହନ୍ତା ଦନ୍ତା । ଆଉ ଶାନ୍ତିରେ ନିଶ୍ବାସ ମାରିଛନ୍ତି ଯାଜପୁର ଜିଲ୍ଲାବାସୀ ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
