ଯାଜପୁର: କଥାରେ ଅଛି ବିପଦ ଆସିଲେ ପାହାଡ ଭାଙ୍ଗି ଆସେ l କୋରେଇ ବ୍ଲକ ତଳଗଡ ପଞ୍ଚାୟତ ମଙ୍ଗରାଜପୁର ଗାଁରେ ସ୍ୱାମୀ ମୁଖ ଗହ୍ୱର କର୍କଟ ରୋଗରେ ପୀଡିତ ଥିବାବେଳେ ସ୍ତ୍ରୀ ମଧୁମେହ ରୋଗରେ ଶଯ୍ୟାଶାୟୀ । ଏମାନଙ୍କ ପାଖରେ ନା ଅଛି ରୋଜଗାର ନା ଅଛି ସରକାରୀ ଯୋଜନା । ବଞ୍ଚିବା ପାଇଁ ଦିନ ରାତି ସଂଘର୍ଷ କରୁଛନ୍ତି ଏହି ବୃଦ୍ଧ ଦମ୍ପତି l ଯେଉଁଠି ଗୋଟେ ଓଳି ଖାଇବା ପାଇଁ ନାହିଁ ସେଠି ରୋଗର ଚିକିତ୍ସା ବା କରିବେ କେମିତି l
ସଦାଶିବ ଏକ ଚାହା ଦୋକାନ କରି ଅନେକ ଦିନ ନିଜର ପରିବାର ପ୍ରତିପୋଷଣ କରୁଥିଲେ l ହଠାତ କିଛି ବର୍ଷ ତଳେ ମୁଖ ଗହ୍ୱର ରୋଗରେ ପୀଡିତ ହୋଇ ଥିଲେ ସଦାଶିବ l ଏହାପରେ ବିପଦର ପାହାଡ ଯେମିତି ମାଡି ଆସିଲା ସଦାଶିବଙ୍କ ପରିବାର ଉପରେ ପରେ ସ୍ତ୍ରୀ କାମିନୀ ମଧ୍ୟ ମଧୁମେହ ରୋଗରେ ପୀଡିତ ହେଲେ l ବାପା ମାଆଙ୍କର ଏଭଳି ଅବସ୍ଥା ଦେଖି ମାନସିକ ଭାରସାମ୍ୟ ହରାଇ ଥିଲେ ସଦାଶିବଙ୍କ ଏକମାତ୍ର ପୁଅ l ଅର୍ଥ ଅଭାବରୁ ଘର ଖଣ୍ଡେ କରି ନ ପାରି ଏଭଳି ଏକ ଭଙ୍ଗା ଦଦରା ଘରେ ଅତି ଦୟନୀୟ ଅବସ୍ଥାରେ ପଡି ରହିଛନ୍ତି ଉଭୟ ଦମ୍ପତି। ନା ଏହି ପରିବାରକୁ ମିଳିଛି ବାର୍ଦ୍ଧକ୍ୟ ଭତ୍ତା ନା ମିଳିଛି ଆବାସ ଯୋଜନାରେ ଘର l ସଦାଶିବ ସାହାଯ୍ୟ ପାଇଁ ପ୍ରଶାସନ ଓ ରାଜନେତାଙ୍କ ନିକଟକୁ ବାରମ୍ବାର ଧାଇଁ ଧାଇଁ ନୟାନ୍ତ ହୋଇପଡିଥିଲେ ସୁଦ୍ଧା କେହି ସହାୟତାର ହାତ ବଢାଇ ନହାନ୍ତି l ଏଭଳି ସମୟରେ ସରକାର କିମ୍ବା ସ୍ବେଚ୍ଛାସେବୀ ସେମାନଙ୍କୁ ସାହାର୍ଯ୍ୟ କରିବା ପାଇଁ ନିବେଦନ କରିଛନ୍ତି ଉଭୟ ଦମ୍ପତି ।
ଗରିବ ଅସହାୟ ଲୋକଙ୍କ ପାଇଁ ରାଜ୍ୟ ସରକାର ମାଳ ମାଳ ଯୋଜନା କରୁଛନ୍ତି l ମାତ୍ର କିଛି ସଚେତନତା ଅଭାବ ଯୋଗୁଁ ଏହି ଯୋଜନା ସଠିକ ସମୟରେ ସଠିକ ଲୋକଙ୍କ ପାଖରେ ପହଞ୍ଚିବାରେ ବ୍ୟତିକ୍ରମ ଦେଖିବାକୁ ମିଳୁଛି l ଅନ୍ୟ ଉପରେ ନିର୍ଭର କରି ଚଳୁଛନ୍ତି ଏହି ଅସହାୟ ବୃଦ୍ଧ ଦମ୍ପତି l ସାହି ପଡିଶା ଯିଏ ଯେତେବେଳେ ଯାହା ଦିଏ ତାହା ଖାଇ ପେଟ ପୁରେ । ଯଦି ଯେଉଁଦିନ କିଛି ନ ମିଳେ ସେଦିନ ପାଣିପିଇ ଶୋଇବାକୁ ପଡେ ଏହି ବୃଦ୍ଧ ଦମ୍ପତିଙ୍କୁ । ପେଟକୁ ଦିଓଳି ଦିମୁଠା ଦାନା ମିଳିବା କଷ୍ଟକର ହେଇପଡ଼ିଥିବା ବେଳେ ଏଭଳି ବୃଦ୍ଧ ଦମ୍ପତି ନିଜର ଚିକିତ୍ସା ପାଇଁ ଔଷଧ ଖର୍ଚ୍ଚ ତୁଲାଇବା କାଠିକର ପାଠ ହେଇ ପଡିଛି ।
ଯଦି ସରକାର ଗରିବ ଅସହାୟ ମାନଙ୍କ ପାଇଁ ଏତେ ଯୋଜନା କରୁଛନ୍ତି ତା ହେଲେ ଏହି ବୃଦ୍ଧ ଦମ୍ପତିଙ୍କ ପାଖରେ ସେ ଯୋଜନା କାହିଁକି ପହଞ୍ଚି ପାରୁନି ତାହାକୁ ନେଇ ଏବେ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି l ଏଭଳି କ୍ଷେତ୍ରରେ ଏହି ବୃଦ୍ଧ ଦାମ୍ପତିଙ୍କୁ ତୁରନ୍ତ ସରକାରୀ ଯୋଜନାରେ ଆବାସ ଓ ଭତ୍ତା ଯୋଗାଇ ଦେବାକୁ ଦାବି କରିଛନ୍ତି ଗ୍ରାମବାସୀ l ସେପଟେ ଗୁହାରି ଶୁଣି ତଦନ୍ତ କରି ଖୁବଶୀଘ୍ର ସମସ୍ତ ସରକାରୀ ଯୋଜନା ଯୋଗାଇ ଦେବେ ବୋଲି ବିଡ଼ିଓ ପ୍ରତିଶୃତି ଦେଇଛନ୍ତି।
ଇଟିଭି ଭାରତ, ଯାଜପୁର
