ଯାଜପୁର: ଏକ ସମ୍ବେଦନଶୀଳ ଘଟଣାରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ଅଭିଯୋଗ ପାଇବା ପରେ ଜିଲ୍ଲା ଶିଶୁ ସୁରକ୍ଷା ୟୁନିଟର ନିଦ ଭାଙ୍ଗିଛି । ଯାଜପୁର ଜିଲ୍ଲା ଦାନଗଦୀ ବ୍ଲକ ଗୋବରଘାଟି ପଞ୍ଚାୟତର ବେଲବାହାଳି ଗାଁରୁ ଏକ ଅବହେଳିତ ନାବାଳକକୁ ଉଦ୍ଧାର କରିଛି ଶିଶୁ ସୁରକ୍ଷା ୟୁନିଟ୍ । ନାବାଳକ ଜଣକ କଳିଙ୍ଗନଗର ଶିଳ୍ପାଞ୍ଚଳ ଉପକଣ୍ଠରେ ଥିବା ବେଲବାହାଳି ଗାଁର ନାଗେଶ୍ବର ହାଇବୁରୁଙ୍କ 14 ବର୍ଷୀୟ ପୁଅ ମାନସିଂ ବୋଲି ଜଣାପଡିଛି ।
ପିଲାଟି ବାପା ମାଙ୍କୁ ହରାଇବା ପରେ ସର୍ବହରା ହୋଇଯାଇଛି । ଏବେ ସେ ଯକ୍ଷ୍ମାରୋଗରେ ଆକ୍ରାନ୍ତ ହେବା ପରେ ତା ପାଠପଢାରେ ମଧ୍ୟ ଲାଗିଛି ବେଡି । ପରିବାରରେ ତାର ସାନ ବଡ କରି 5 ଭଉଣୀ । ସେଥି ମଧ୍ୟୁ ଜଣେ ଲେମ୍ବୁ, ଧନିଆଁ ଆଦି ବିକ୍ରି କରି ପେଟ ପାଇଁ ଦାନ ଯୋଗାଡ କରୁଥିବା ବେଳେ । ଏବେ ଖେଳିବା ବୁଲିବା ବୟସରେ ମାନସିଂ ଉପରେ ପରିବାର ଦାୟିତ୍ୱ ପଡିଛି ।
ତେବେ ଏ ନେଇ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ଅଭିଯୋଗ ପତ୍ର ଆସିବା ପରେ ଜିଲ୍ଲା ପ୍ରଶାସନ ପକ୍ଷରୁ ତତ୍ପରତା ପ୍ରକାଶ ପାଇଛି । ଜିଲ୍ଲା ପ୍ରଶାସନର ନିର୍ଦ୍ଦେଶକ୍ରମେ ଜିଲ୍ଲା ଶିଶୁ ସୁରକ୍ଷା ୟୁନିଟ୍ ନାବାଳକକୁ ଉଦ୍ଧାର କରି ସିଡବ୍ଲ୍ୟୁସିଙ୍କୁ ହସ୍ତାନ୍ତର କରିଛି । ନାବାଳକର ଚିକିତ୍ସା କରାଇବା ସହିତ ତାର ପାଠପଢା ଓ ଅନ୍ୟ ସମସ୍ତ ଦାୟିତ୍ବ ନିଆଯିବ ବୋଲି ଜିଲ୍ଲା ଶିଶୁ ସୁରକ୍ଷା ୟୁନିଟର ସଦସ୍ୟ ତପନ କୁମାର ପଣ୍ଡା କହିଛନ୍ତି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
