ଯାଜପୁର: ରାଜ୍ୟ ବାହାରୁ ପ୍ରବାସୀମାନଙ୍କୁ ପ୍ରଥମେ କ୍ବାରେଣ୍ଟାଇନ ସେଣ୍ଟରରେ ରଖାଯାଇ ସେମାନଙ୍କ ଯତ୍ନ ନିଆଯାଉଥିବା ବେଳେ ସେମାନଙ୍କ ସେବା ପାଇଁ ଦିନରାତି ଏକ କରି କାମ କରୁଛନ୍ତି ସ୍ବାସ୍ଥ୍ୟକର୍ମୀ ଓ ଆଶାକର୍ମୀ । ହେଲେ ସମ୍ମାନ ଦେବା ବଦଳରେ କ୍ବାରେଣ୍ଟାଇନ ସେଣ୍ଟରରେ ଜଣେ ଆଶାକର୍ମୀଙ୍କୁ ଦୁର୍ବ୍ୟବହାର କରାଯାଇଥିବା ଅଭିଯୋଗ ଆସିଛି । ଘଟଣାଟି ହେଉଛି ଯାଜପୁର ଜିଲ୍ଲା ସୁକିନ୍ଦା ବ୍ଲକ ଅନ୍ତର୍ଗତ ସୁବଳ ଗ୍ରାମର । ଏଠାରେ ଥିବା କ୍ବାରେଣ୍ଟାଇନ ସେଣ୍ଟରରେ ପ୍ରବାସୀଙ୍କ ସେବାରେ ନିୟୋଜିତ ଆଶାକର୍ମୀ ସଙ୍ଗୀତା ନାୟକଙ୍କୁ ପ୍ରବାସୀ ଦୁର୍ବ୍ୟବହାର କରିଥିବା ଅଭିଯୋଗ ହୋଇଛି ।
ଅଭିଯୋଗ ମୁତାବକ ପ୍ରବାସୀଙ୍କ ସଂସ୍ପର୍ଶରେ ଆଶାକର୍ମୀ ଜଣଙ୍କ ଆସିବାରୁ ତାଙ୍କୁ ସନ୍ଦିଗ୍ଧ କହି ବାସନ୍ଦ କରିବାକୁ ପ୍ରବାସୀମାନେ ଗ୍ରାମବାସୀଙ୍କୁ ପ୍ରବର୍ତ୍ତାଇଥିଲେ । ଏନେଇ ଆଶାକର୍ମୀଙ୍କୁ ଅନେକ ଅସୁବିଧାର ସମ୍ମୁଖୀନ ହେବାକୁ ପଡିଥିବା ସେ ଜଣାଇଛନ୍ତି । ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ କଳିଙ୍ଗନଗର ଅତିରିକ୍ତ ଜିଲ୍ଲାପାଳଙ୍କ ନିକଟରେ ସେ ଦାବି କରିଛନ୍ତି ।
ଆଶାକର୍ମୀ ଜଣଙ୍କ ଏହା ମଧ୍ୟ କହିଛନ୍ତି କି ତାଙ୍କୁ ବାରମ୍ବାର ଧମକ ଚମକ ଦିଆଯାଉଛି । ଏଥିପାଇଁ ତାଙ୍କ ଜୀବନ ପ୍ରତି ବିପଦ ଥିବା ସେ ମନେ କରିବା ସହ ଏସମ୍ପର୍କରେ ସେ ବିଭାଗୀୟ ଅଧିକାରୀଙ୍କୁ ଅବଗତ କରାଇଥିବା ଜଣାଇଛନ୍ତି । ସେପଟେ ସମ୍ପୃକ୍ତ ଘଟଣାର ନିନ୍ଦା କରିବା ସହ ଅଭିଯୁକ୍ତଙ୍କୁ ଶାସ୍ତି ଦେବା ପାଇଁ ସ୍ଥାନୀୟ ଅଞ୍ଚଳର ମାନବାଧିକାର କର୍ମୀ ସ୍ବର ଉତ୍ତୋଳନ କରିଛନ୍ତି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
