ଯାଜପୁର: ରାଜ୍ୟରେ ବେକାବୁ କୋରୋନା ଆକ୍ରାନ୍ତଙ୍କ ସଂଖ୍ୟା । ଏପଟେ ଯାଜପୁର ଜିଲ୍ଲାରେ ମଧ୍ୟ କୋରୋନା ପଜିଟିଭଙ୍କ ସଂଖ୍ୟା ଦିନକୁ ଦିନ ବଢିବାରେ ଲାଗିଛି । ଜିଲ୍ଲାରେ ଗତକାଲି 201 ପଜିଟିଭ ଚିହ୍ନଟ ହୋଇଥିବା ବେଳେ ଆଜି151 ଜଣ ପଜିଟିଭ ଚିହ୍ନଟ ହୋଇଛନ୍ତି । ତେବେ ବର୍ତ୍ତମାନ ସୁଦ୍ଧା ଜିଲ୍ଲାରେ 7506 ଜଣ ପଜିଟିଭ୍ ଚିହ୍ନଟ ହୋଇଛନ୍ତି ଏବଂ ସେଥି ମଧ୍ୟରୁ 5751 ଜଣ ସୁସ୍ଥ ହୋଇଛନ୍ତି । ଜିଲ୍ଲାରେ ବଢିଚାଲିଥିବା କୋରୋନା ସଂକ୍ରମଣର ମୁକାବିଲା ପାଇଁ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଛି ।
ଜିଲ୍ଲାରେ ୩୫୫ଜଣ ମନିଟରଙ୍କୁ ନିଯୁକ୍ତି ଦିଆଯାଇଥିବା ବେଳେ ଟ୍ରେସିଂ ଓ ଆୱାରନେସ ଉପରେ ଅଧିକ ଗୁରୁତ୍ବ ଦିଆଯାଉଛି । ସେହିପରି ଜିଲ୍ଲାରେ ୪ ଗୋଟି ଫିବର କ୍ଲିନିକ ଖୋଲାଯାଇ ଥଣ୍ଡା, ଜ୍ବର ଓ କାଶ ହେଉଥିବା ରୋଗୀଙ୍କର ମାଗଣା ଚିକିତ୍ସା କରାଯାଉଛି । ଅଗକୁ ଏଭଳି ଫିବର କ୍ଲିନିକର ସଂଖ୍ୟାକୁ ବୃଦ୍ଧି କରାଯାଇ ପ୍ରତ୍ୟେକ ବ୍ଲକ ହେଡକ୍ବାର୍ଟରରେ ଖୋଲାଯିବାର ବ୍ୟବସ୍ଥା କରାଯାଉଛି । ପଜିଟିଭ ସଂଖ୍ୟାକୁ ନେଇ ବିଭିନ୍ନ ଗାଁକୁ ରେଡ ଜୋନ ଓ ଗ୍ରୀନ ଜୋନ ଭାବେ ଘୋଷଣା କରାଯାଇ ଅଧିକରୁ ଅଧିକ ଟେଷ୍ଟ କରାଯିବାର ବ୍ୟବସ୍ଥା କରାଯାଇଛି ।
କୋଭିଡ ନିୟନ୍ତ୍ରଣ ପାଇଁ ପ୍ରଶାସନ ପକ୍ଷରୁ ନିଆଯାଉଥିବା ପଦକ୍ଷେପକୁ ସମସ୍ତେ ସହଯୋଗ କରିବାକୁ ଜିଲ୍ଲାପାଳ ନିବେଦନ କରିଛନ୍ତି । ଲୋକଙ୍କ ସହଯୋଗ ରହିଲେ ଆଗାମୀ ୧୫ରୁ ୨୦ ଦିନ ମଧ୍ୟରେ ଜିଲ୍ଲାରେ କୋରୋନାକୁ ହ୍ରାସ କରାଯାଇପାରିବ ବୋଲି ଜିଲ୍ଲାପାଳ କହିଛନ୍ତି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
