ଯାଜପୁର: ଗୋଟିଏ ପଟେ କୋରୋନା ନିଜର କାୟା ବିସ୍ତାର କରି ଚାଲିଥିବା ବେଳେ ଧର୍ମଶାଳା ଥାନା ଦେଓଦା ଗ୍ରାମରେ ଘଟିଛି ଅଭାବନୀୟ ଘଟଣା । ହୋମ କ୍ବାରେଣ୍ଟାଇନରେ ଥିବା ଜଣେ ଯୁବକଙ୍କର ସୋମବାର ମୃତଦେହ ଉଦ୍ଧାର ହୋଇଛି । ଘର ନିକଟସ୍ଥ ବାଡିରେ ତାଙ୍କର ଝୁଲନ୍ତା ମୃତଦେହ ଦେଖିବାକୁ ମିଳିଥିଲା । ମୃତକ ଜଣଙ୍କ ହେଉଛନ୍ତି ସମ୍ପୃକ୍ତ ଗ୍ରାମର ସୁରେଶ ସାହୁ ।
ସୁରେଶ ଚେନ୍ନାଇର ଏକ ହୋଟେଲରେ କାମ କରୁଥିଲେ । ହେଲେ କୋରୋନା ସ୍ଥିତି ପାଇଁ ଗତ ମାସ 18 ତାରିଖରେ ସେ ଘରକୁ ଫେରିଥିଲେ । ଏହାପରେ 20 ମାର୍ଚ୍ଚରୁ ତାଙ୍କୁ ହୋମ କ୍ବାରେଣ୍ଟାଇନରେ ରହିବା ପାଇଁ ପ୍ରଶାସନ ନିର୍ଦ୍ଦେଶ ଦେଇଥିଲା । କୌଣସି ଲକ୍ଷଣ ନଥିବା ସତ୍ତ୍ବେ ସେ 14 ଦିନ କ୍ବାରେଣ୍ଟାଇନରେ ରହିବା ପରେ ପୁଣି ଗାଁରେ ବୁଲାବୁଲି ଆରମ୍ଭ କରିଥିଲେ ।
ଏହାକୁ ନେଇ ଗ୍ରାମବାସୀ ଅସନ୍ତୋଷ ପ୍ରକାଶ କରିବା ସହ ସୁରେଶଙ୍କ ପରିବାର ସହ ମନୋମାଳିନ୍ୟ ହୋଇଥିଲା । ପରେ ସୋମବାର ନିକଟସ୍ଥ ବାଡିରୁ ତାଙ୍କର ଝୁଲନ୍ତା ମୃତଦେହ ଉଦ୍ଧାର ହୋଇଛି । ତେବେ ଗ୍ରାମବାସୀ ରାଗ ରଖି ସୁରେଶଙ୍କର ହତ୍ୟା କରିଥିବା ଅଭିଯୋଗ କରିଛନ୍ତି ପରିବାର ଲୋକେ । ସେପଟେ ଖବର ପାଇ ଧର୍ମଶାଳା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ବ୍ୟବଚ୍ଛେଦ ପାଇଁ ପଠାଇବା ସହ ତଦନ୍ତ ଆରମ୍ଭ କରିଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
