ଜଗତସିଂହପୁର : ଜଗତସିଂହପୁର ଜିଲ୍ଲା ବିରିଡି ବ୍ଲକ ଅନ୍ତର୍ଗତ ବିଜୁ ଭବନ ନିକଟ ୫୫ ନମ୍ବର ଜାତୀୟ ରାଜପଥ ଠାରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଏଥିରେ ଜଣଙ୍କର ମୃତ୍ୟୁ ହୋଇଥିବା ବେଳେ ଦୁଇ ଜଣଙ୍କୁ ଗୁରୁତର ଅବସ୍ଥାରେ କଟକ ସ୍ଥାନାନ୍ତର କରାଯାଇଛି । ଏହି ଘଟଣାକୁ ନେଇ ସ୍ଥାନୀୟ ଲୋକେ ୫୫ ନମ୍ବର ଜାତୀୟ ରାଜପଥକୁ ଅବରୋଧ କରିବା ସହ ମୃତ ବ୍ୟକ୍ତିଙ୍କ ପରିବାରକୁ ସହାୟତା ପାଇଁ ଦାବୀ କରିଛନ୍ତି । ମୃତକ ଜଣକ ହେଉଛନ୍ତି ସଞ୍ଜୟ ସ୍ୱାଇଁ ।
ବିରିଡି ଥାନା ଅନ୍ତର୍ଗତ ଦଣ୍ଡିଲ ଗ୍ରାମର ସଞ୍ଜୟ ସ୍ୱାଇଁ ଓ ତାଙ୍କ ସାଥୀ ନିର୍ମଳ ସାହୁ ବାଇକରେ କଟକ ଆଡକୁ ଯିବା ସମୟରେ ହଠାତ ଏକ ବୋଲେରୋ ତାଙ୍କୁ ଓଭର ଟେକ କରିଥିଲା । ଫଳରେ ସେ ଭାରସାମ୍ୟ ହରାଇବାରୁ ଏକ ଟାଟା ମ୍ୟାଜିକ ସହ ତାଙ୍କ ବାଇକ ଧକ୍କା ହୋଇଥିଲା । ଟାଟା ମ୍ୟାଜିକ ମଧ୍ୟ ବାଇକକୁ ରକ୍ଷା କରିବାକୁ ଯାଇ ଏକ ଗଛରେ ପିଟି ହୋଇଯାଇଥିଲା ।
ଫଳରେ ଟାଟା ମ୍ୟାଜିକ ଡ୍ରାଇଭର ଗାଡି ଭିତରେ ଚାପି ହୋଇଯାଇଥିଲେ। ଏହାଦେଖି ସ୍ଥାନୀୟ ଲୋକେ ବାଇକ ଆରୋହୀ ଦୁଇଜଣ ଓ ଟାଟା ମ୍ୟାଜିକ ଡ୍ରାଇଭରକୁ ଉଦ୍ଧାର କରି ପ୍ରଥମେ ବିରିଡି ଗୋଷ୍ଠୀ ସ୍ଵାସ୍ଥ୍ୟକେନ୍ଦ୍ର ଓ ପରେ ଜଗତସିଂହପୁର ସ୍ଥାନାନ୍ତର କରିଥିଲେ । ସେଠାରେ ସଞ୍ଜୟଙ୍କୁ ଡାକ୍ତର ମୃତ ଘୋଷଣା କରିଥିଲେ ।
ତେବେ ଅନ୍ୟ ଦୁଇ ଜଣଙ୍କୁ ସେଠାରୁ ତୁରନ୍ତ କଟକ ଏସସିବିକୁ ସ୍ଥାନାନ୍ତର କରାଯାଇଛି । ଘଟଣାସ୍ଥଳରେ ପୋଲିସ ପହଁଞ୍ଚି ଉତ୍ୟକ୍ତ ଲୋକଙ୍କୁ ବୁଝାସୁଝା କରୁଥିବା ଦେଖିବାକୁ ମିଳିଛି ।
ଇଟିଭି ଭାରତ, ଜଗତସିଂହପୁର
