ଜଗତସିଂହପୁର: ବହୁ ଚର୍ଚ୍ଚିତ ନର୍ସ ନୀହାରିକା ହତ୍ୟାକାଣ୍ଡର ଅଭିଯୁକ୍ତ ଏବେ ପୋଲିସ ରିମାଣ୍ଡରେ । ପୋଲିସ ନିକଟରେ ଅଭିଯୁକ୍ତ ପ୍ରେମିକ କିଶୋର ଅଞ୍ଚଳ ଓରଫ ରାଜା ହତ୍ୟା କରିଥିବା କଥା ସ୍ବୀକାର କରିଛି । ଏହା ପରେ ଅଧିକ ତଦନ୍ତ ପାଇଁ 3 ଦିନ ରିମାଣ୍ଡରେ ଆଣିଛି ବିରିଡି ପୋଲିସ ।
ସୂଚନାନୁସାରେ, ଆଜି ଜଗତସିଂହପୁର ଏସଡିଜେଏମ୍ କୋର୍ଟରେ ବିରିଡ଼ି ପୋଲିସ ଅଭିଯୁକ୍ତ ରାଜାକୁ 5 ଦିନ ରିମାଣ୍ଡରେ ନେବା ପାଇଁ ଆବେଦନ କରିଥିଲା । କିନ୍ତୁ କୋର୍ଟ ଅଭିଯୁକ୍ତକୁ 3 ଦିନ ରିମାଣ୍ଡରେ ନେବାକୁ ଅନୁମତି ଦେଇଛନ୍ତି । ଆସନ୍ତା 25 ତାରିଖ ସନ୍ଧ୍ୟା 5.30 ପର୍ଯ୍ୟନ୍ତ ଅଭିଯୁକ୍ତକୁ ରିମାଣ୍ଡରେ ନିଆଯାଇଛି ।
ରାଜା ନିହାରିକାକୁ କେମିତି ଓ କାହିଁକି ହତ୍ୟା କଲା, ତା' ସହ ଏ ହତ୍ୟାରେ ଆଉ କିଏ ସାମିଲ ଅଛି, ତ୍ରିକୋଣୀୟ ପ୍ରେମ କାହାଣୀକୁ ନେଇ ଏ ହତ୍ୟା ହୋଇନାହିଁ ତ, ଏଭଳି ଅନେକ ପ୍ରଶ୍ନର ଉତ୍ତର ଖୋଜିବାକୁ ପୋଲିସ ରାଜାକୁ ରିମାଣ୍ଡରେ ଆଣିଛି । ଆଜି ସନ୍ଧ୍ୟା 6.30ରେ ଆଳିପିଙ୍ଗଳ ଉପକାରାଗାରରୁ ଅଭିଯୁକ୍ତ ରାଜାକୁ ବିରିଡ଼ି ପୋଲିସ ଏକ ଆଜ୍ଞାତ ସ୍ଥାନକୁ ନେଇଥିବା ସୂଚନା ମିଳିଛି ।
ଜଗତସିଂହପରରୁ ସୁଶାନ୍ତ ପାତ୍ର, ଇଟିଭି ଭାରତ
