ଜଗତସିଂହପୁର: ବିଦ୍ୟୁତ ମିଟର ରିଡ଼ିଙ୍ଗକୁ ନେଇ ଉପଭୋକ୍ତାଙ୍କ ମହଲରେ ତୀବ୍ର ଅସନ୍ତୋଷ । ଜିଲ୍ଲାରେ ଏକ ଘରୋଇ ଠିକା ସଂସ୍ଥା ଏଞ୍ଜେନ, ମିଟର ରିଡ଼ିଙ୍ଗ ଓ ବିଦ୍ୟୁତ ବିଲ ଆଦାୟକୁ କେନ୍ଦ୍ର କରି ଅସନ୍ତୋଷ ବ୍ୟକ୍ତ କରିଛି ଜିଲ୍ଲା ଉପଭୋକ୍ତା ସଂଘ।
ଏନେଇ ସଂଘ ଉପଦେଷ୍ଟା ବାସୁଦେବ ଷଡ଼ଙ୍ଗୀ ଅଭିଯୋଗ କରିଛନ୍ତି ଯେ, କମ୍ପାନୀ ପକ୍ଷରୁ ମାସକୁ ଥରେ ମିଟର ରିଡ଼ିଙ୍ଗ ନିଆ ନଯାଇ 40ରୁ 45 ଦିନରେ ଏକାସଙ୍ଗେ ରିଡ଼ିଙ୍ଗ ନିଆଯାଉଛି। ଯାହାଫଳରେ ଉପଭୋକ୍ତାଙ୍କୁ ଅଧିକ ବିଦ୍ୟୁତ ଦେୟ ଦେବାକୁ ପଡୁଥିବାରୁ ଅଧିକ କ୍ଷତି ସହିବାକୁ ପଡୁଛି।
ଧାର୍ଯ୍ୟ ଦର ଅନୁସାରେ, ଡୋମେଷ୍ଟିକ କରେଣ୍ଟ ପାଇଁ ୟୁନିଟ ପିଛା 2 ଟଙ୍କା 50 ପଇସା ଦରରେ 50 ୟୁନିଟ ପର୍ଯ୍ୟନ୍ତ ଦେବାକୁ ପଡୁଥିବାବେଳେ 50 ୟୁନିଟ ପରେ ଉପଭୋକ୍ତାଙ୍କୁ ୟୁନିଟ ପିଛା 4.30 ପଇସା ଓ 100 ୟୁନିଟ ପରେ ହେଲେ 5 ଟଙ୍କା 30 ପଇସା ଦେବାକୁ ପଡ଼ୁଛି।
40 ରୁ 45 ଦିନ ପରେ ମିଟର ରିଡ଼ିଙ୍ଗ ନିଆଯାଉ ଥିବାରୁ ୟୁନିଟ ବଢି ଯାଉଛି । ଯାହାଦ୍ବାରା ବିଦ୍ୟୁତ ଉପଭୋକ୍ତା ଶୋଷଣର ଶିକାର ହେଉଛନ୍ତି । ଏସମ୍ପର୍କରେ ଆମେ ସେସୁ SDO ବାବୁଲି ବେହେରାଙ୍କୁ ପଚାରିବାରୁ ସେ ଚଳିତମାସରେ ମିଟର ରିଡ଼ିଙ୍ଗରେ ବିଳମ୍ବ ହୋଇଥିବା ସ୍ବୀକାର କରିଛନ୍ତି ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
