ଜଗତସିଂହପୁର: ଅଦୃଶ୍ୟ ମହାମାରୀ କୋରୋନା ଦେଇଛି ଅସହ୍ୟ ଦୁଃଖ । ଲକଡାଉନରେ ପ୍ରଭାବିତ ହୋଇଛି ଜୀବନ ଜୀବିକା, ବାଜିରେ ଲାଗିଛି ବେଉସା ।
ରିକ୍ସା ଚଳାଇ ଯାହା ଯାହା କିଛି ଟଙ୍କା ରୋଜଗାର ହୁଏ ସେଥିରେ ଚଳେ ଦୁଆରୀ ମଉସାଙ୍କ ଚାରି ପ୍ରାଣୀ କୁଟୁମ୍ବ । ଜଗତସିଂହପୁର ସହର ଉପକଣ୍ଠ ପାଟଣୀ ଗାଁ ର 75 ବର୍ଷୀୟ ରିକ୍ସା ଚାଳକ ଦୁଆରୀ ମଲ୍ଲିକ । ପରିବାର ପ୍ରତିପୋଷଣ ପାଇଁ ପରିଣତ ବୟସରେ କରିବାକୁ ପଡୁଛି ସଂଘର୍ଷ । କୋରୋନା କିପରି ତାଙ୍କର ବେଉସା ବୁଡାଇ ଦେଇଛି ସେ ସମ୍ପର୍କରେ କୋହ ଭରା କଣ୍ଠରେ କ୍ୟାମେରା ଆଗରେ କହିଛନ୍ତି ।
ସକାଳୁ ସକାଳୁ ନିଜ ରିକ୍ସାଟିକୁ ଧରି ବଜାରକୁ ଚାଲିଆସନ୍ତି । ଯାହାକିଛି ମିଳେ ସେଥିରେ ଚଳି ଯାଉଥିଲା ତେଲ ଲୁଣର ସଂସାର । କିନ୍ତୁ ଲକ ଡାଉନ ଫଳରେ ଏବେ ରାସ୍ତାଘାଟ ଶୁନଶାନ୍ । ଗ୍ରାହକଙ୍କ ଅପେକ୍ଷାରେ ସଞ୍ଜ ନଉଛି ହେଲେ କାହାର ବି ଦେଖା ନାହିଁ । ନିରାଶ ହୋଇ ଘରକୁ ଫେରୁଛନ୍ତି ।
ଘରେ ସ୍ତ୍ରୀ ସହ ଦୁଇଟି ବଢ଼ିଲା ଝିଅ । ସରକାର ଚାଉଳ ଦେଉଛନ୍ତି ହେଲେ ଅନ୍ୟ ସାମଗ୍ରୀ କିଣିବାକୁ ସମ୍ବଳ ନାହିଁ । ପରିଣତ ବୟସରେ ବିଶ୍ରାମ କଥା ପଚାରିବାରୁ ଟିକେ ହସିଦେଇ ରିକ୍ସାକୁ ଆଗକୁ ଗଡେଇ ନେଇଥିଲେ ସେ । କୋରୋନା ସହ ଦୁଆରୀ ମଉସାଙ୍କ ଲଢେଇ ଅନେକଙ୍କୁ ହତବାକ କରିଛି ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
