ବ୍ରହ୍ମପୁର: ପାନୀୟ ଜଳ ବିକ୍ରି କରାଯାଉଥିବା ପାଣି ଜାର ମଧ୍ୟରେ ବେଆଇନ ଭାବରେ ହେଉଥିଲା ସ୍ପିରିଟ୍ କାରବାର । ଅଭିଯୋଗ ପରେ ଚଢାଉ କରିଲା ଅବକାରୀ ଗୁଇନ୍ଦା ବିଭାଗ । ୧୭ ଶହ ଲିଟର ବେଆଇନ ଗଚ୍ଛିତ ସ୍ପିରିଟ ଜବତ କରାଯାଇଥିବା ବେଳେ ୩ ଜଣଙ୍କୁ ଗିରଫ କରାଯାଇଛି ।
ଏନେଇ ବ୍ରହ୍ମପୁର ଅବକାରୀ ଗୁଇନ୍ଦା ବିଭାଗର ଅଧିକାରୀ ଗୀତାଞ୍ଜଳୀ ସାହୁ କହିଛନ୍ତି,"ସ୍ପିରିଟ ଚାଲାଣ ନେଇ ଆମକୁ ଆଗରୁ ଖବର ମିଳିଥିଲା । ଏହା ପରେ ଏକ ସ୍ୱତନ୍ତ୍ର ଟିମ୍ ସହର ଉପକଣ୍ଠ ମହୁରୀକାଳୁଆ ଛକ ନିକଟରେ ଅପେକ୍ଷା କରି ରହିଥିବା ବେଳେ ସେହି ରାସ୍ତାରେ ଏକ ସ୍କୁଟି ଯୋଗେ ପାନୀୟ ଜଳ ବିକ୍ରି ପାଇଁ ବ୍ୟବହାର ହେଉଥିବା ପାଣି ଜାରରେ୍ ସ୍ପିରିଟ୍ ନେଇ ଯାଉଥିଲେ । ତେବେ ସନ୍ଦେହ ହେବାରୁ ତାଙ୍କୁ ଅଟକାଇ ଚେକିଂ କରାଯାଇଥିଲା । ତେବେ ବିପୁଳ ପରିମାଣରେ ସ୍ପିରିଟ ଜବତ କରାଯାଇଥିବା ବେଳେ ୩ ଜଣଙ୍କୁ ଗିରଫ କରାଯାଇଛି ।"
ତେବେ ପଚରାଉଚରା ସମୟରେ ସେମାନେ ବ୍ରହ୍ମପୁର ସହରର ବଡଖେମୁଣ୍ଡି ସାହିରେ ଏକ ଘରରେ ସ୍ପିରଟ ରଖିଥିବା ନେଇ କହିଥିଲେ । ଏହାପରେ ବ୍ରହ୍ମପୁର ଗୁଇନ୍ଦା ବିଭାଗ ପକ୍ଷରୁ ଚଢାଉ କରାଯାଇ ସ୍ପିରିଟ ଜବତ କରାଯାଇଥିଲା । ମୋଟ ୩ଜଣଙ୍କୁ ଗିରଫ କରାଯାଇଛି । ଗିରଫ ଅଭିଯୁକ୍ତ ମାନେ ହେଲେ ଗଞ୍ଜାମ ଜିଲ୍ଲାର ଦିଗପହଣ୍ଡି ନିକଟବର୍ତ୍ତୀ ଫାଶୀ ଗୁଡା ଗ୍ରାମର ଶିବ ଡାକୁଆ, ଶଙ୍କର ପ୍ରଧାନ ଓ ସଞ୍ଜିବ ପ୍ରଧାନ ।
ଏହା ମଧ୍ୟ ପଢନ୍ତୁ: BMC କର୍ପୋରେସନକୁ ବର୍ଷେ, ଲୋକଙ୍କ ସମସ୍ୟା ନୁହେଁ ଦଳୀୟ ପ୍ରଚାର କରାଯାଉଥିବା କହିଲେ ବିରୋଧୀ
ବ୍ରହ୍ମପୁର ଉପକଣ୍ଠରେ ବେଆଇନ ଭାବରେ ନକଲି ବିଦେଶୀ ମଦ କାରବାରକୁ ରୋକିବା ପାଇଁ ଅବକାରୀ ଓ ପୋଲିସ ବିଭାଗ ପକ୍ଷରୁ କ୍ରମାଗତ ଭାବରେ ପ୍ରୟାସ କରାଯାଉଛି । ଏନେଇ ଅବକାରୀ ଗୁଇନ୍ଦା ବିଭାଗର ଡେପୁଟି କମିଶନର କହିଛନ୍ତି, " ନକଲି ସ୍ପିରିଟକୁ ନେଇ ବିଭିନ୍ନ ନାମୀ ଦାମୀ କମ୍ପାନୀର ବିଦେଶୀ ମଦ ପ୍ରସ୍ତୁତ କରି ମଦମାଫିଆମାନେ ବିଭିନ୍ନ ସ୍ଥାନରେ ଛୋଟ ମୋଟ ବ୍ୟବସାୟୀମାନଙ୍କୁ ବିକ୍ରି କରୁଛନ୍ତି । ଏନେଇ ଅନେକ ଅଭିଯୋଗ ହେଉଥିବା ବେଳେ ତାଙ୍କୁ ଧରିବାରେ ମଧ୍ୟ ସକ୍ଷମ ହେଉଛୁ । ଏହି ଘଟଣାରେ ଗିରଫ ଅଭିଯୁକ୍ତମାନେ ଅନ୍ୟ କାହାରିକୁ ଏହି ସ୍ପିରିଟ୍ ଯୋଗାଇ ଆସୁଥିଲେ ଏବଂ କେଉଁ ସ୍ଥାନରୁ ଏଭଳି ବିପୁଳ ପରିମାଣର ସ୍ପିରିଟ କ୍ରୟ କରାଯାଉଥିଲା ତାହାକୁ ଅଧିକ ତଦନ୍ତ ପରେ ସ୍ପଷ୍ଟ କରାଯିବ ।"
ଇଟିଭି ଭାରତ, ବ୍ରହ୍ମପୁର
