ବ୍ରହ୍ମପୁର/ଭଞ୍ଜନଗର: ଗଞ୍ଜାମ ଜିଲ୍ଲାରେ ମଙ୍ଗଳବାର ଠାରୁ ଆରମ୍ଭ ହୋଇଛି ଡୋର ଟୁ ଡୋର ହେଲଥ୍ ସ୍କ୍ରିନିଂ କାର୍ଯ୍ୟକ୍ରମ । ଜିଲ୍ଲାରେ ନିୟମିତ ଭାବରେ କୋରୋନା ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଉଥିବାବେଳେ ଏହା ସମସ୍ତଙ୍କ ପାଇଁ ଚିନ୍ତାର ବିଷୟ ପାଲଟିଛି । ଏଭଳି ସମୟରେ ଏହି ସଂକ୍ରମଣରେ ରୋକ ଲଗାଇବା ପାଇଁ ଜିଲ୍ଲା ପ୍ରଶାସନ ନିର୍ଦ୍ଦେଶକ୍ରମେ ଆଜି ଠାରୁ ସମ୍ପୂର୍ଣ୍ଣ ଜିଲ୍ଲାରେ ଏପରି କାର୍ଯ୍ୟକ୍ରମ ହାତକୁ ନେଇଛି ଜିଲ୍ଲା ପ୍ରଶାସନ ।
ଅଙ୍ଗନବାଡ଼ି କର୍ମୀ, ଆଶା କର୍ମୀମାନେ ଘରକୁ ଘର ବୁଲି ଥର୍ମାଲ ସ୍କ୍ରିନିଂ କରିବା ସହ ଅମ୍ଳଜାନ ସ୍ତର ପରୀକ୍ଷା କରିବା ସହ ବାହାର ରାଜ୍ୟରୁ ଫେରିଥିବା ପ୍ରବାସୀଙ୍କ ତଥ୍ୟ ସଂଗ୍ରହ କରି ଟିକାକରଣ ବିଷୟରେ ପଚାରି ବୁଝିଛନ୍ତି । ଜିଲ୍ଲାପାଳ ବିଜୟ ଅମୃତା କୁଲାଙ୍ଗେ ଏହି କାର୍ଯ୍ୟକ୍ରମକୁ ନିଜେ ବିଭିନ୍ନ ସ୍ଥାନରେ ବୁଲି ବୁଲି ତଦାରଖ କରୁଥିବା ମଧ୍ୟ ଦେଖିବାକୁ ମିଳିଛି । ସେହପରି ଉପଜିଲ୍ଲାପାଳ , ତହସିଲଦାର , ସିଡିପିଓ , ପୌର କାର୍ଯ୍ୟନିର୍ବାହୀ ଅଧିକାରୀଙ୍କ ସମତେ ବହୁ ପ୍ରଶାସନିକ ଅଧିକାରୀମାନେ ଏହାର ସମୀକ୍ଷା କରିଛନ୍ତି । ଜିଲ୍ଲାର ସମସ୍ତ ଗ୍ରାମାଞ୍ଚଳ ଓ ସହରାଞ୍ଚଳରେ ଏହି ସ୍ବାସ୍ଥ୍ୟଯାଞ୍ଚ ପ୍ରକ୍ରିୟା ଆରମ୍ଭ ହୋଇସାରିଛି । ଏହାସହିତ ଯେଉଁମାନଙ୍କର କୋରୋନା ଲକ୍ଷଣ ପ୍ରକାଶ ପାଏ ସେମାନଙ୍କର ପରୀକ୍ଷା ମଧ୍ୟ କରାଯିବ । ସ୍ବାସ୍ଥ୍ୟ ଯାଞ୍ଚ ସହିତ ଲୋକଙ୍କୁ କୋରୋନା ସଂକ୍ରମଣ ନେଇ ମଧ୍ୟ ଏହି ସ୍ବାସ୍ଥ୍ୟ ଯାଞ୍ଚ ଟିମ୍ ସଚେତନ କରିବ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ
