ଢେଙ୍କାନାଳ: ପୋଲ ତଳୁ ଜଣେ ଯୁବକଙ୍କ ମୃତଦେହ ଉଦ୍ଧାର । ଏଭଳି ଏକ ଘଟଣା ଘଟିଛି ଢେଙ୍କାନାଳ ଜିଲ୍ଲା ଭୁବନ ବିଜ୍ଞାପିତ ପରିଷଦର ଏକ ପୋଲ ନିକଟରେ । ମୃତ ଯୁବକ ଜଣଙ୍କ ହେଉଛନ୍ତି ବିଜ୍ଞାପିତ ଅଞ୍ଚଳ ପରିଷଦର ଓ୍ବାର୍ଡ ନଂ-୨ କଲୋନୀ ସାହିର ଦିପୁ ଦାସ।
ଗତକାଲି ସଂନ୍ଧ୍ୟା ସମୟରେ କଲୋନୀ ସାହି ରାସ୍ତା କଲଭଟ ଉପରେ କିଛି ଯୁବକମାନଙ୍କ ସହିତ ଦିପୁ ବସିଥିବାର ପରିବାର ଲୋକେ ଦେଖିଥିଲେ । ରାତି ବିଳମ୍ବ ହେବାରୁ ଦିପୁକୁ ପରିବାର ଲୋକେ ଖୋଜାଖୋଜି କରିଥିଲେ । ମାତ୍ର ଦିପୁଙ୍କୁ ପାଇନଥିଲେ । ଆଜି ସକାଳେ ସେହି କଲଭଟ ତଳେ ଦିପୁ ପଡିଥିବାର ଦେଖି ତାଙ୍କୁ ଉଦ୍ଧାର କରି ଭୁବନ ଡାକ୍ତରଖାନାରେ ଭର୍ତ୍ତି କରାଇଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିବା ଜଣାପଡିଛି ।
ତେବେ ଉକ୍ତ ଯୁବକଙ୍କର ମୃତ୍ୟୁକୁ ନେଇ ଏହାକୁ ହତ୍ୟା ସନ୍ଦେହ କରୁଛନ୍ତି ପରିବାର ଲୋକେ । ଏନେଇ ପରିବାର ଲୋକେ ଭୁବନ ଥାନାରେ ହତ୍ୟା ଅଭିଯୋଗ କରିଥିବା ଜଣାପଡ଼ିଛି । ଭୁବନ ପୋଲିସ ଡାକ୍ତରଖାନାରେ ପହଞ୍ଚି ମୃତଦେହକୁ ଜବତ କରି ବ୍ୟବଛେଦ ପାଇଁ ପଠାଇ ତଦନ୍ତ ଆରମ୍ଭ କରିଛି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
