ଢେଙ୍କାନାଳ: ଜିଲ୍ଲା ମୁଖ୍ୟ କାରାଗାରରେ ଜଣେ ବିଚାରଧୀନ କଏଦୀର ମୃତ୍ୟୁ ଘଟିଛି । ମୃତକ ଜଣଙ୍କ ଢେଙ୍କାନାଳ ସଦର ଥାନା ଅନ୍ତର୍ଗତ ହରିପୁର ଗ୍ରାମର ୪୮ ବର୍ଷୀୟ ବ୍ରହ୍ମା ଦେହୁରୀ ବୋଲି ଜଣାପଡିଛି । ସେ ଜଣେ ହତ୍ୟା ଅଭିଯୁକ୍ତ ହୋଇଥିବାବେଳେ ମୃତ୍ୟୁର ସଠିକ କାରଣ ଜଣାପଡିନାହିଁ।
ଗତକାଲି(ମଙ୍ଗଳବାର) ସକାଳ ପ୍ରାୟ ସାଢ଼େ ୧୦ ଟାରେ ପେଟରେ ଯନ୍ତ୍ରଣା ଯୋଗୁଁ ତାଙ୍କୁ ଜିଲ୍ଲା କାରାଗାର ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଏହାପରେ ସେ ସୁସ୍ଥ ହୋଇଥିଲେ । ପରେ ପୁଣି ଅସୁସ୍ଥ ହେବାରୁ ଗତ ରାତିରେ ଢେଙ୍କାନାଳ ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ମାତ୍ର ଡାକ୍ତରଖାନାରେ ଆଜି ଭୋର ସମୟରେ ତାଙ୍କର ମୃତ୍ୟୁ ଘଟିଥିବା ଜଣାପଡିଛି ।
ମୃତ ବ୍ରହ୍ମା ଦେହୁରୀ ଗତ ୨୦୧୩ ମସିହା ଜୁଲାଇ ୭ ତାରିଖରେ ଜମିବାଡି ବିବାଦକୁ ନେଇ ତାଙ୍କ ଗ୍ରାମର ଅଭିନ ଦେହୁରୀ ଓ ମଞ୍ଜୁ ଦେହୁରୀ ନାମକ ଭିନ୍ନକ୍ଷମ ଦମ୍ପତିଙ୍କୁ ପିଟି ପିଟି ହତ୍ୟା କରିବାପରେ ଫେରାର ହୋଇଯାଇଥିଲା । ପରେ ସଦର ଥାନା ପୋଲିସ ତାକୁ ହତ୍ୟା ଅଭିଯୋଗରେ ଗିରଫ କରି କୋର୍ଟ ଚାଲାଣ କରିଥିଲା । ତେବେ ଗତ ୨୦୧୩ ମସିହା ଅଗଷ୍ଟ୧୦ ତାରିଖରୁ ଢେଙ୍କାନାଳ ମୁଖ୍ୟ କାରାଗାରରେ ବିଚାରଧୀନ କଏଦୀ ଭାବେ ଥିଲେ । ତେବେ ତାଙ୍କ ମୃତ୍ୟୁ ପରେ ମୃତଦେହକୁ ଢେଙ୍କାନାଳ ମୁଖ୍ୟ ଡାକ୍ତରଖାନାର ଶବ ବ୍ୟବଚ୍ଛେଦ ଗୃହରେ ରଖାଯାଇଥିବାବେଳେ ଟାଉନ ପୋଲିସ ପ୍ରାଥମିକ ତଦନ୍ତ ଆରମ୍ଭ କରିଛି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
