ଢେଙ୍କାନାଳ: ଲାଞ୍ଚ ନେଇ ନେଇ ଖସୁଥିବା ଲାଞ୍ଚୁଆ ପୋଲିସ ବାବୁ ଶେଷର ଆଇନ ଜାଲରେ ଛନ୍ଦି ହୋଇଛନ୍ତି । ଜଣେ କ୍ରସର ମାଲିକଙ୍କ ଠାରୁ ୩୦ହଜାର ଟଙ୍କା ଲାଞ୍ଚ ନେବା ବେଳେ ଭିଜିଲାନ୍ସ କାବୁ କରିଥିବା ହିନ୍ଦୋଳ ଏସଡିପିଓ ମଳୟ କିଶୋର ନାୟକଙ୍କ ଜାମିନ ନାମଞ୍ଜୁର ହୋଇଛି । ଫଳରେ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି ।
ଗତକାଲି ମଳୟଙ୍କ ଠାରୁ ଲାଞ୍ଚ ୩୦ହଜାର ଟଙ୍କା ଜବତ କରିଥିବା ସହ ତାଙ୍କୁ ଗିରଫ କରିଥିଲା ଭିଜିଲାନ୍ସ । ଗୁରୁବାର ମଳୟଙ୍କୁ ଢେଙ୍କାନାଳ ସ୍ବତନ୍ତ୍ର ଭିଜିଲାନ୍ସ କୋର୍ଟକୁ ଚାଲାଣ ପରେ କୋର୍ଟ ତାଙ୍କ ଜାମିନକୁ ଖାରଜ କରିଦେଇଥିବା ଜଣାପଡିଛି । ସୂଚନା ଥାଉ କି ତାଙ୍କ ସରକାରୀ କ୍ବାର୍ଟରରେ ଚଢଉ ପୂର୍ବରୁ ମଳୟଙ୍କ ପତ୍ନୀ ସୁନା ଗହଣା ଓ ଟଙ୍କା ଭର୍ତ୍ତି ଏକ ବାକ୍ସ ନେଇ ଫେରାର ଥିବାରୁ ସେ ଭିଜିଲାନ୍ସ ସ୍କାନରରେ ରହିଛନ୍ତି । ଅପରପକ୍ଷେରେ ଭିଜିଲାନ୍ସ ପକ୍ଷରୁ ମଳୟ ବେଆଇନ ଭାବେ ଠୁଳ କରିଥିବା ପ୍ରାୟ ୨କୋଟି ଟଙ୍କାରୁ ଊର୍ଦ୍ଧ୍ବ ମୂଲ୍ୟର ସମ୍ପତ୍ତି ଠାବ କରିଛି । ସେଥିମଧ୍ୟରୁ ଭୁବନେଶ୍ବର, ପୁରୀ, ସମ୍ବଲପୁର ଓ ଅନୁଗୋଳ ଆଦି ସହରରେ ବହୁ ମୂଲ୍ୟବାନ ଓ ବିଳାଶପୂର୍ଣ୍ଣ କୋଠା ଠାବ କରିଛି ଭିଜିଲାନ୍ସ ।
ଇଟିଭି ଭାରତ, ଢେଙ୍କାନାଳ
