ଢେଙ୍କାନାଳ: ବାହାନଗା ଭୟଙ୍କର ଟ୍ରେନ ଟ୍ରାଜେଡିକୁ ନେଇ ଆଉ ଏକ ଛାତିଥରା କାହାଣୀ ସାମନାକୁ ଆସିଛି । ବ୍ୟବସାୟ କାର୍ଯ୍ୟରେ କୋଲକତା ଯାଇ ଫେରିବା ବାଟରେ ହିଁ ଭୟଙ୍କର ଟ୍ରେନ ଦୁର୍ଘଟଣାରେ ଜଣେ ବ୍ୟକ୍ତିଙ୍କ ଜୀବନ ଯାଇଛି । ବୃଦ୍ଧା ମାଆ ପୁଅର ଫେରିବା ବାଟକୁ ଚାହିଁ ବସିଥିବା ବେଳେ ପୁଅ ଫେରିଛି ସତ । ହେଲେ ଜୀବିତ ଅବସ୍ଥାରେ ନୁହେଁ । ଫେରିଛି ପୁଅର ମର ଶରୀର । ଏଭଳି ହୃଦୟ ବିଦାରକ ଘଟଣା ଦେଖିବାକୁ ମିଳିଛି ଢେଙ୍କାନାଳ ଜିଲ୍ଲାରେ । ଭୁବନ ବିଜ୍ଞାପିତ ଅଞ୍ଚଳ ପରିଷଦର ଓ୍ବାର୍ଡ-୯ରେ ରହୁଥିବା କ୍ରିଷ୍ଣା କୁମାର ଅଗ୍ରଓ୍ବାଲ କପଡା ବ୍ୟବସାୟ କରି ପରିବାର ପ୍ରତିପୋଷଣ କରନ୍ତି । ପ୍ରାୟ 10ରୁ 15 ବର୍ଷ ହେବ ସ୍ତ୍ରୀ ଆରପାରିକୁ ଚାଲିଯାଇଥିବାବେଳେ ପରିବାର କହିଲେ ୮୫ ବର୍ଷୀୟା ବୃଦ୍ଧା ମାଆ, ଦୁଇ ଝିଅଙ୍କ ମଧ୍ୟରୁ ଜଣଙ୍କର ବିବାହ ସରିଥିବାବେଳେ ଅନ୍ୟ ଜଣେ ଅବିବାହିତ ।
ତେବେ କାହ୍ନୁ ଭାରତୀୟ ଏୟାର ଫୋର୍ସ ଅଧିକାରୀ ଭାବେ କାର୍ଯ୍ୟରତ କମଳ ଅଗ୍ରୱାଲ ଏବଂ ବରିଷ୍ଠ ଅର୍ଥନୀତିଜ୍ଞ ରମଣ ଅଗ୍ରଓ୍ବାଲଙ୍କର ବଡ଼ ଭାଇ । କାହ୍ନୁ ଭୁବନ ଗୁଜରିହାଟ ସ୍ଥିତ ନିଜ ବାସଭବନ ତଳେ ଥିବା ଦୋକାନରେ ବ୍ୟବସାୟ କରନ୍ତି । ଜଣେ ସଫଳ ବ୍ୟବସାୟୀ ହୋଇଥିବାବେଳେ କାହ୍ନୁଭାଇ ଭାବେ ସମସ୍ତଙ୍କର ପ୍ରିୟ ଥିଲେ କ୍ରିଷ୍ଣା କୁମାର ଅଗ୍ରୱାଲ । ତାଙ୍କର ମୃତ୍ୟୁରେ ଗୁଜରିହାଟ ବଣିକ ସଂଘର ଅପୂରଣୀୟ କ୍ଷତି ହୋଇଥିବା କହିଛନ୍ତି ସଂଘର ସଦସ୍ୟ । ତେବେ କାହ୍ନୁଙ୍କୁ ସମ୍ନାନ ଜଣାଇ ତାଙ୍କର ଅମର ଆତ୍ମାର ସଦଗତି ନିମନ୍ତେ ରବିବାର ବଜାର ବନ୍ଦ କରାଯିବା ସହ ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଥିବା ବ୍ୟବସାୟୀମାନେ ପ୍ରକାଶ କରିଛନ୍ତି ।
ସେହିପରି କାହ୍ନୁ ଜଣେ ପରୋପକାରୀ ଦରଦୀ ମଣିଷ ଥିଲେ ବୋଲି ଗ୍ରାମବାସୀ କହିଛନ୍ତି । କାହ୍ନୁ ଘରର ବଡ଼ ପୁଅହୋଇ ଘର ଚଳାଇବା ସହିତ ସାନ ଭାଇ ମାନଙ୍କୁ ଉଚ୍ଚ ଶିକ୍ଷିତ କରିବା ପାଇଁ ଅନେକ ସଂଘର୍ଷ କରିଥିଲେ । ଏହାସହ ଅଞ୍ଚଳରେ ଶିତଳା ମାତା ମନ୍ଦିର ପ୍ରତିଷ୍ଠା କରି ସମସ୍ତଙ୍କର ପ୍ରିୟର ପାତ୍ର ହୋଇଥିଲେ ସେ । ତେବେ ଗତ 3 ଦିନ ତଳେ କାହ୍ନୁ ବ୍ୟବସାୟ କାର୍ଯ୍ୟରେ କୋଲକତାରୁ ଟ୍ରେନ ଯୋଗେ ଫେରୁଥିଲେ । ସେହି ସମୟରେ ବାହାନଗା ଠାରେ ସେ ଟ୍ରେନ ଦୁର୍ଘଟଣାର ଶିକାର ହୋଇ ମୃତ୍ୟୁବରଣ କରିଛନ୍ତି । ଯାହାକୁ ନେଇ ପରିବାର ସମେତ ସମଗ୍ର ଗାଁରେ ଶୋକାକୂଳ ପରିବେଶ ସୃଷ୍ଟି ହୋଇଛି। ଭୁବନେଶ୍ବର ଏମ୍ସ ହସପିଟାଲରେ କାହ୍ନୁଙ୍କର ମରଶରୀର ରଖାଯାଇଥିବାବେଳେ ପରିବାରକୁ କାହ୍ନୁଙ୍କର ମୃତଦେହ ହସ୍ତାନ୍ତର ପରେ ସ୍ବର୍ଗଦ୍ବାରରେ ଶେଷକୃତ୍ୟ ସମ୍ପନ୍ନ କରାଯିବ ବୋଲି ଜଣାପଡିଛି ।
ଇଟିଭି ଭାରତ, ଢେଙ୍କାନାଳ
