ଢେଙ୍କାନାଳ: ଶହୀଦ ବୀର ବାଜି ରାଉତଙ୍କୁ ମରଣୋତ୍ତର ଭାରତରତ୍ନ ସମ୍ମାନ ପ୍ରଦାନ ପାଇଁ ଦାବି । ଦେଶର ସର୍ବ କନିଷ୍ଠ ଶହୀଦ ବୀର ବାଜି ରାଉତ । ସେହି ବୀର ଶହୀଦଙ୍କୁ ଭାରତରତ୍ନ ସମ୍ମାନରେ ସମ୍ମାନିତ କରିବାକୁ ଦାବି କରିଛନ୍ତି ଢେଙ୍କାନାଳବାସୀ । ଏଥିପାଇଁ ଆରମ୍ଭ ହୋଇଛି 'ଆନ୍ଦୋଳନ ଅଭିଯାନ' ।
ଭୁବନ ବ୍ଲକ ଅନ୍ତର୍ଗତ ନିଳକଣ୍ଠପୁର ଗ୍ରାମରେ ତାଙ୍କର ଜନ୍ମ । ଢେଙ୍କାନାଳ ଗଡଜାତ ଅଧିନସ୍ଥ ପ୍ରଜା ଆନ୍ଦୋଳନର ରକ୍ତିମ ସ୍ଥାନ ହେଉଛି ନିଳକଣ୍ଠପୁର ଗ୍ରାମ । ଯେଉଁ ଗ୍ରାମର ୧୨ ବର୍ଷର ବାଳକ ବାଜିରାଉତ ଇଂରେଜମାନଙ୍କ ବନ୍ଧୁକ ଗୁଳିରେ ପ୍ରାଣ ବିସର୍ଜନ କରିଥିଲେ ।
ସେହି ବୀର ଶହୀଦଙ୍କୁ ଭାରତରତ୍ନ ସମ୍ମାନରେ ମରଣୋତ୍ତର ଭାବରେ ସମ୍ମାନିତ କରିବା ନିମନ୍ତେ ଆବେଗଭରା କଣ୍ଠରେ ନିବେଦନ କରିଛନ୍ତି ଅଞ୍ଚଳବାସୀ । ଏଥିପାଇଁ ଗାଁରୁ ଆନ୍ଦୋଳନ ଅଭିଯାନ ନାମକ ଏକ ଆନ୍ଦୋଳନ ମାଧ୍ୟମରେ ସଦସ୍ୟମାନେ ଦାବି କରିଛନ୍ତି ।
ବାଜିରାଉତଙ୍କୁ ଭାରତରତ୍ନ ପ୍ରଦାନ ଓ ସାତ ଦଫା ଦାବି ପତ୍ର ପ୍ରଦାନ ନିମନ୍ତେ ଅଞ୍ଚଳବାସୀ ଓ ଗାଁରୁ ଆନ୍ଦୋଳନ ଅଭିଯାନର ସଦସ୍ୟ ପ୍ରଥମେ ଭୁବନ ଡାକବଙ୍ଗଳାରେ ଏକତ୍ର ହୋଇଥିଲେ । ସମସ୍ତେ ଏକତ୍ର ହୋଇ ଭୁବନ ଡାକବଙ୍ଗଳାରୁ ବାହାରି ଶୋଭାଯାତ୍ରା କରି ଭୁବନ ବିଡିଓଙ୍କ ଜରିଆରେ ମହାମହିମ ରାଷ୍ଟ୍ରପତି ଭାରତ ସରକାରଙ୍କୁ ପ୍ରଦାନ କରାଯାଇଛି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
