କଟକ: ବସ ଭିତରେ ନାବାଳିକାଙ୍କୁ ଅସଦାଚରଣ ଘଟଣା । ଅଭିଯୁକ୍ତ ବସ କଣ୍ଡକ୍ଟରକୁ ଗିରଫ କଲା କଟକ ବାଦାମବାଡି ଥାନା ପୋଲିସ। ଢେଙ୍କାନାଳ ରାସୋଳରୁ ତାଙ୍କୁ ଗିରଫ କରାଯାଇଥିବା ସୂଚନା ମିଳିଛି । ଅଭିଯୁକ୍ତ କଣ୍ଡକ୍ଟର ଗତ 5 ତାରିଖ ରାତିରେ ଜଣେ ନାବାଳିକାଙ୍କୁ ବସ ଭିତରକୁ ଟାଣି ନେଇ ଅସଦାଚରଣ କରିଥିବା ଅଭିଯୋଗ ହୋଇଥିଲା ।
ଗତ 5 ତାରିଖ ରାତିରେ ପ୍ରାୟ 10ଟା ବେଳେ ନାବାଳିକା ଜଣକ ନିଜ ବାପାଙ୍କ କୌଣସି କାମରେ କଟକରେ ଅନୁଗୋଳ ବସ୍କୁ ଅପେକ୍ଷା କରିଥିଲେ । ବାପା କିଛି ସମୟ ପାଇଁ ଝିଅକୁ ସେଠାରେ ଛାଡ଼ି ବସଷ୍ଟାଣ୍ଡ ବାହାରକୁ ଆସିଥିଲେ। ଏହି ସମୟରେ ଅନୁଗୋଳରୁ କଟକ ଆସିଥିବା ଏକ ଘରୋଇ ବସ୍ର କଣ୍ଡକ୍ଟର ନାବାଳିକା ଜଣଙ୍କୁ ଏକୁଟିଆ ପାଇ ବସ ଭିତରକୁ ନେଇଯାଇଥିଲେ । ବସ ସମ୍ପୂର୍ଣ୍ଣ ଖାଲିଥିବାରୁ ଏହାର ସୁଯୋଗ ନେଇ ନାବାଳିକାଙ୍କ ସହ ଅସଦାଚରଣ କରିଥିଲେ ।
ଏହା ମଧ୍ୟ ପଢ଼ନ୍ତୁ: ବସ ଭିତରେ ନାବାଳିକାଙ୍କୁ ଅସଦାଚରଣ ! କଣ୍ଡକ୍ଟର ବିରୋଧରେ ଏତଲା
ତେବେ ନାବାଳିକା ଜଣଙ୍କ କୌଶଳକ୍ରମେ ବସ ଭିତରୁ ବାହାରି ଆସି ସ୍ଥାନୀୟ ଘଟଣା ସମ୍ପର୍କରେ ବ୍ୟବସାୟୀମାନଙ୍କୁ ଜଣାଇଥିଲେ । ଘଟଣା ପ୍ରଘଟ ହେବାପରେ ଏନେଇ କଟକ ବାଦାମବାଡି ଥାନାରେ ନାବାଳିକାଙ୍କ ପରିବାର ପକ୍ଷରୁ ଅଭିଯୋଗ ହୋଇଥିଲା । କମିଶନରେଟ ପୋଲିସ ତଦନ୍ତ କରି ଆଜି(ରବିବାର) ଢେଙ୍କାନାଳ ରାସୋଳରୁ ଅଭିଯୁକ୍ତ ବସ କଣ୍ଡକ୍ଟରକୁ ବାଦାମବାଡି ଥାନା ପୋଲିସ ଗିରଫ କରିଛି ।
ଇଟିଭି ଭାରତ, କଟକ
