କଟକ: ବିଶ୍ବବାସୀଙ୍କୁ ନିଜ କରାଳ ରୂପ ଦେଖାଉଛି କୋରୋନା ମହାମାରୀ । ଏହି ଅଦୃଶ୍ୟ ଭାଇରସ ବିରୋଧରେ ସଭିଏଁ ଲଢୁଥିବାବେଳେ କେତେବେଳେ ଓ କେଉଁ ମୂହୂର୍ତ୍ତରେ ଏହା କାହାକୁ ଗ୍ରାସ କରୁଛି ତାହା କହିବା ଅସମ୍ଭବ । ତେବେ ଏହି ମହାମାରୀର ନେତୃତ୍ବ ନେଇ ଆଗଧାଡିରେ ଥିବା ଅନେକ କୋଭିଡ ଯୋଦ୍ଧା ମଧ୍ୟ ଏହି ଭୂତାଣୁର ବଶବର୍ତ୍ତୀ ହୋଇଛନ୍ତି । କିନ୍ତୁ ଦୁଃଖର ବିଷୟ ଯେ ଅନେକ କୋଭିଡ ଯୋଦ୍ଧାଙ୍କୁ ମଧ୍ୟ ମହାମାରୀ ନିଜ କବଳରେ କବଳିତ କରୁଛି । ଆଉ ବିଭିନ୍ନ ସମୟରେ ଅନ୍ୟମାନଙ୍କର ସେମାନଙ୍କ ଓ ସେମାନଙ୍କ ପରିବାର ପ୍ରତି ଘୃଣ୍ୟ ମନୋଭାବର ଚିତ୍ର ମଧ୍ୟ ସାମନାକୁ ଆସୁଛି । ଏମିତି ଏକ ହୃଦୟବିଦାରକ ଭିଡିଓ ସାମ୍ନାକୁ ଆସିଛି ।
ରାଜ୍ୟର ଏକ ପ୍ରତିଷ୍ଠିତ ଗଣମାଧ୍ୟମର ଜଣେ ଭିଡିଓ ସାମ୍ବାଦିକ କୋରୋନା ସଂକ୍ରମିତ ହୋଇଛନ୍ତି । ବର୍ତ୍ତମାନ ସେ ଟାଙ୍ଗି ଡ୍ରିମ୍ସ କୋଭିଡ଼ କେୟାର ସେଣ୍ଟରରେ ଚିକିତ୍ସିତ ହେଉଛନ୍ତି । ଏହି ସମୟରେ ସୋସିଆଲ ମିଡିଆରେ ଏକ ଭିଡିଓ ଜରିଆରେ ସେ ନିଜ ଦୁଃଖ କାହାଣୀ ବର୍ଣ୍ଣନା କରିଛନ୍ତି । ତାଙ୍କର କୋରୋନା ପଜିଟିଭ ଚିହ୍ନଟ ହେବା ସତେ ଯେମିତି ତାଙ୍କ ପରିବାର ପାଇଁ ଏକ ପ୍ରକାର ଅଭିଶାପ ହୋଇଯାଇଛି ।
କଟକ ସହର ଉପକଣ୍ଠରେ ରହୁଥିବା ତାଙ୍କ ପରିବାର ଲୋକଙ୍କୁ ଗାଁ ଲୋକ ହଇରାଣ କରିବା ସହ ତାଙ୍କ ପରିବାର ଲୋକଙ୍କୁ ଏକ ପ୍ରକାର ବାସନ୍ଦ କରି ରଖିଥିବା ସେ ଅଭିଯୋଗ କରିଛନ୍ତି । ତେଣୁ ଏହି ମାମଲାରେ ସେ ରାଜ୍ୟ ସରକାରଙ୍କ ହସ୍ତକ୍ଷେପ ପାଇଁ ଆକୁଳ ନିବେଦନ କରିଛନ୍ତି । ଯଦି ଏହି ମାମଲାରେ ତାଙ୍କ ପରିବାର ପ୍ରତି ନ୍ୟାୟ ନହୁଏ ତେବେ ସେ ଆତ୍ମହତ୍ୟା କରିବେ ବୋଲି ଭିଡିଓ ଜରିଆରେ କହିଛନ୍ତି ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
