କଟକ: କଟକରେ 5ଟି ସଚିବ ଭିକେ ପାଣ୍ଡିଆନ । କଟକ ଜିଲ୍ଲା ସତ୍ୟଭାମାପୁର ଠାରେ ଥିବା ଉତ୍କଳ ଗୌରବ ମଧୁସୂଦନ ଦାସଙ୍କ ଜନ୍ମପୀଠ ପରିଦର୍ଶନ କରିଛନ୍ତି ପାଣ୍ଡିଆନ । ଆଜି ସକାଳୁ ସକାଳୁ 5ଟି ସଚିବ ଏହି ପୀଠ ପରିଦର୍ଶନ କରିବା ସହ ପୀଠର ଉନ୍ନତି ସଂପର୍କରେ ସମୀକ୍ଷା କରିଥିଲେ । ଏହି ଅବସରରେ ବିଭାଗୀୟ ସଚିବ ଓ ସମସ୍ତ ପ୍ରଶାସନିକ ଅଧିକାରୀ ମାନେ ଉପସ୍ଥିତ ଥିଲେ । ପ୍ରଥମେ ତ୍ରିଶୂଳିଆରେ ଏକ ମେଗା ପ୍ରୋଜେକ୍ଟର ସମୀକ୍ଷା କରିବା ପରେ ସତ୍ୟଭାମାପୁର ଅଭିମୁଖେ ଯାଇଥିଲେ 5ଟି ସଚିବ।
ଉତ୍କଳ ଦିବସ ଅବସରରେ ଭିକେ ପାଣ୍ଡିଆନ ସତ୍ୟଭାମାପୁରରେ ପହଞ୍ଚି ମଧୁ ସ୍ମୃତିପୀଠ ପରିଦର୍ଶନ କରିଛନ୍ତି । ସେଠାରେ ମଧୁ ବାବୁଙ୍କ ପ୍ରତିମୂର୍ତ୍ତୀରେ ମାଲ୍ୟାର୍ପଣ କରିବା ସହିତ ସମଗ୍ର ପୀଠ ବୁଲି ଦେଖିଥିଲେ। ବିଭାଗୀୟ ଅଧିକାରୀ ମାନେ ପ୍ରଥମେ ମ୍ୟାପ ମାଧ୍ୟମରେ ପୀଠ ଅବସ୍ଥିତି ଓ ଇତିହାସ ସମ୍ପର୍କରେ ସବିଶେଷ ଜଣାଇଥିଲେ । ପରେ ପୀଠ ପରିସରରେ ଥିବା ସଂଗ୍ରାଳୟ ବୁଲିବା ସହିତ ଏଠାରେ ରଖାଯାଇଥିବା ସ୍ମୃତି ସମ୍ପର୍କରେ ପଚାରି ବୁଝିଥିଲେ । ସ୍ମୃତି ଫଳକ ଓଡ଼ିଆ ସମେତ ଅନ୍ୟ ଭାଷାରେ କରିବାକୁ ସେ ପରାମର୍ଶ ଦେଇଥିଲେ ।
ପରେ ପରେ ପୀଠ ପରିସରରେ ଥିବା ଗାନ୍ଧିଜୀଙ୍କ ଅବସ୍ଥାନ ପୀଠ ଦର୍ଶନ କରିଥିଲେ । ଏହା ପରେ 5ଟି ସଚିବ ମଧୁବାବୁଙ୍କ ଏନ୍ତୁଡ଼ିଶାଳ ରେ ଉତ୍କଳ ଗୌରବଙ୍କ ସ୍ମୃତିଚାରଣ କରିଥିଲେ । ଏଠାରେ ରଖାଯାଇଥିବା ବିରଳ ଫଟୋ ଓ ହସ୍ତଲିପି ସମ୍ପର୍କରେ ଉପସ୍ଥିତ ଟ୍ରଷ୍ଟ କର୍ମକର୍ତ୍ତାଙ୍କ ଠାରୁ ସବିଶେଷ ଜାଣିଥିଲେ । ଶେଷରେ ଉପସ୍ଥିତ ମିଶନ ଶକ୍ତି ମାଆ ମାନଙ୍କ ସହିତ ପୀଠ ସମ୍ପର୍କରେ ଆଲୋଚନା କରିବା ସହିତ ମଧୁ ସ୍ମୃତି ପୀଠରେ ମଧୁବାବୁଙ୍କ ଜୀବନୀକୁ ନେଇ ଲାଇଟ ଆଣ୍ଡ ସାଉଣ୍ଡ ବ୍ୟବସ୍ଥା କରିବା ପାଇଁ ବିଭାଗୀୟ ଅଧିକାରୀଙ୍କୁ ପରାମର୍ଶ ଦେଇଥିଲେ । ଏଥି ସହିତ ପୀଠର ଉନ୍ନତିକରଣ ପାଇଁ ଏକ ବିସ୍ତୃତ ପ୍ରସ୍ତାବ ପ୍ରସ୍ତୁତ କରିବା ପାଇଁ କହିଥିଲେ ।
ଏହି ଅବସରରେ ମଧୁସୂଧନ ସାଂସ୍କୃତିକ ପରିଷଦ ପକ୍ଷରୁ 12ଟି ପ୍ରସ୍ତାବ ସମ୍ବଳିତ ଏକ ପତ୍ର ପ୍ରଦାନ କରାଯାଇଥିଲା । ପୂର୍ବରୁ କଟକରେ 3ଟି ବଡ଼ ପ୍ରୋଜେକ୍ଟ କାମ ଅଗ୍ରଗତିର ସମୀକ୍ଷା କରିଥିଲେ । ନେତାଜୀ ବସ ଟର୍ମିନାଲ, ଏହାପରେ ଚଣ୍ଡି ମନ୍ଦିର ଓ ଶେଷରେ ତାଳଦଣ୍ଡା କେନାଲ ଓ ଛତ୍ରବଜାର ପିଣ୍ଡିର କାର୍ଯ୍ୟ ସମୀକ୍ଷା କରିଥିଲେ । 70 କୋଟି ଟଙ୍କା ବ୍ୟୟ ଅଟକଳରେ ମନ୍ଦିରର ଚାଲିଛି ଉନ୍ନତିକରଣ କାମ । ନଭେମ୍ବର ସୁଦ୍ଧା ଶେଷ ହେବ ପୁରା କାର୍ଯ୍ୟ । ଏହାସହ ବସ ଟର୍ମିନାଲର କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଛି ।
ବସ ଟର୍ମିନାଲର କାର୍ଯ୍ୟ ଦ୍ରୁତ ଗତିରେ ଚାଲିଥିବା ବେଳେ ଏବେ ଅନ୍ତିମ ପର୍ଯ୍ୟାୟରେ ପହଞ୍ଚିଲାଣି। । ଏକ ବୃହତ ବସ ଟର୍ମିନାଲ, ସାଧାରଣ ଯାତ୍ରୀବାହୀ ବସ୍ ପାଇଁ ସ୍ଥାନ, ସ୍ଥାନୀୟ ଓ ମୋ ବସ୍ ସେବା ପାଇଁ ସ୍ଥାନ, ଯାନ ମରାମତି ଓ ରକ୍ଷଣାବେକ୍ଷଣ ବ୍ଲକ, ଚାରି ଚକିଆ ଯାନ ଓ ଅଟୋ ପାଇଁ ସ୍ବତନ୍ତ୍ର ପାକିଂ ବ୍ୟବସ୍ଥା କରାଯାଇଛି । ଏହା ସହ ଏହି ବସ ଟର୍ମିନାଲ ନିର୍ମାଣ କରାଯାଇ ଏଥିରେ ଯାତ୍ରୀ ବିଶ୍ରାମସ୍ଥଳ, ଫୁଡ କୋର୍ଟ, ଟିକେଟ ଗୃହ ଓ ଅନେକ ସୁବିଧା ଉପଲବ୍ଧ କରିବା ପାଇଁ ବ୍ୟବସ୍ଥା କରାଯାଇଛି। ଏହି ଟର୍ମିନାଲରେ ଏକ ସମୟରେ ୧୯୧ ବସ୍ ପାର୍କିଂ ବ୍ୟବସ୍ଥା କରାଯାଇଛି। । ବସ ଟର୍ମିନାଲ ପାଖାପାଖି ୧୬ ଏକର ସ୍ଥାନରେ କରାଯାଇଛି । ସେହିପରି ନଭେମ୍ବର ସୁଦ୍ଧା ଶେଷ ହେବ ମାଆ କଟକ ଚଣ୍ଡୀ ମନ୍ଦିରର ସୌନ୍ଦର୍ଯ୍ୟକରଣ କାର୍ଯ୍ୟ ।
ଇଟିଭି ଭାରତ, କଟକ
