କଟକ: ବଜାରରେ ପିଆଜ ଦର ଏବେ ଦେଢଶହ ଟପିଲାଣି । ଦିନକୁ ଦିନ ପିଆଜର ଏଭଳି ଆକାଶଛୁଆଁ ଦରବୃଦ୍ଧି ଦେଖି ଲୋକେ ଏବେ ପିଆଜ ଚୋରି କରିବାକୁ ମଧ୍ୟ ପଛାଉ ନାହାନ୍ତି । ଏଭଳିସ୍ଥିତିରେ କଟକର ସାଲେପୁର ରାଇସୁଙ୍ଗୁଡା଼ ବଜାରରେ ପାଖାପାଖି ୮ ଟି ଦୋକାନରୁ ପିଆଜ ଚୋରି ହୋଇଥିବା ଅଭିଯୋଗ ହୋଇଛି ।
ପିଆଜ ଚୋରି ନେଇ ସାଲେପୁର ଥାନାରେ ମାମଲା ରୁଜୁ କରାଯାଇଛି । ପିଆଜର ଅହେତୁକ ଦରବୃଦ୍ଧି ଯୋଗୁଁ ରାତ୍ରି ସମୟରେ ପିଆଜ ଚୋରି ହେଉଥିବା ସ୍ଥାନୀୟ ବ୍ୟବସାୟୀ ଅଭିଯୋଗ କରି ଏହି ମାମଲା ରୁଜୁ କରିଛନ୍ତି । ପାଖାପାଖି ୮ ଟି ଦୋକାନରୁ ୧୦ କେଜିରୁ ଅଧିକ ପିଆଜ ଚୋରି ହୋଇଥିବା ଅଭିଯୋଗ ହୋଇଛି ।
ପ୍ରତିଦିନ ଭଳି ରାତ୍ରି ସମୟରେ ବ୍ୟବସାୟୀମାନେ ଦୋକାନ ବନ୍ଦ କରି ଘରକୁ ଯାଇଥିଲେ । ମାତ୍ର ଏହାର ସୁଯୋଗ ନେଇ ଦୁର୍ବୃତ୍ତମାନେ ପିଆଜ ଚୋରି କରୁଛନ୍ତି । ପେଟ୍ରୋଲିଂ ଠିକ୍ ଭାବରେ ହେଉ ନଥିବାରୁ ଏଭଳି ଚୋରି ହେଉଥିବା ବ୍ୟବସାୟୀମାନେ ଅଭିଯୋଗ କରିଛନ୍ତି । ଏହି ଖବର ଏବେ ସାଲେପୁର ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।
କଟକରୁ ନାରାୟଣ ସାହୁ, ଇଟିଭି ଭାରତ
