ବୌଦ୍ଧ: ବୌଦ୍ଧ ଜିଲ୍ଲାର ପଡୋଶୀ ଅନୁଗୋଳ ଜିଲ୍ଲାର ବାସୁଦେବପୁର ପଞ୍ଚାୟତରେ ଭାଲୁ ଆକ୍ରମଣରେ ମହିଳା ଗୁରୁତର । ଚାଷକାମ କରିବାକୁ ଯାଇଥିବା ସମୟରେ ଭାଲୁ ଆକ୍ରମଣରେ ଗୁରୁତର ମହିଳା । ଦୀର୍ଘ ସମୟ ଅପେକ୍ଷା କରିଥିଲେ ମଧ୍ୟ ବନ ବିଭାଗ କର୍ମଚାରୀ ପରେ ନପହଞ୍ଚିବା ଯୋଗୁଁ ଗୁରୁତର ମହିଳାଙ୍କୁ ଅଟୋରେ ଆଣି ବୌଦ୍ଧ ଡାକ୍ତରଖାନାରେ ଭର୍ତ୍ତି କରାଯାଇଛି ।
ଅନୁଗୋଳ ଜିଲ୍ଲା ବାସୁଦେବପୁର ପଞ୍ଚାୟତର ନକଟିଦେଉଳ ଗାଁର ବିମଳ ପେରେକ(୫୦) ଭାଲୁ ଆକ୍ରମଣରେ ଗୁରୁତର ହୋଇଛନ୍ତି । ସୂଚନା ମୁତାବକ ନକଟିଦେଉଳ ଗାଁର ବିମଳ ଶୁକ୍ରବାର ସକାଳ ପ୍ରାୟ ସାତଟା ବେଳେ ନିଜ ଜମିକୁ ଘାସ ବାଛିବା ପାଇଁ ଯାଇଥିଲା ବେଳେ ତିନୋଟି ଭାଲୁ ଏକା ସହ ଅତର୍କିତ ଆକ୍ରମଣ କରିଛନ୍ତି । ଭାଲୁଙ୍କ ସହ ତାଙ୍କର ଧସ୍ତାଧସ୍ତି ହେବାରୁ ଦୁଇଟି ଭାଲୁ ଚାଲିଯାଇଥିଲେ ମଧ୍ୟ ଗୋଟିଏ ଭାଲୁ ବିମଳଙ୍କ ମୁଣ୍ଡ ,ଗୋଡ,ହାତ ଓ ପେଟକୁ ଆକ୍ରମଣ କରି ଚିରି ପକାଇଛି ।
ଫଳରେ ଭାଲୁ ଆକ୍ରମଣରେ ସେ ଗୁରୁତର ଅବସ୍ଥାରେ ଗ୍ରାମବାସୀଙ୍କ ଦ୍ବାରା ଉଦ୍ଧାର ହୋଇଛନ୍ତି । ତୁରନ୍ତ ବନ ବିଭାଗକୁ ଖବର ଦିଆଯାଇଥିଲେ ସୁଦ୍ଧା ଦୀର୍ଘ ସମୟ ଅପେକ୍ଷା ପରେ ମଧ୍ୟ କୌଣସି ଅଧିକାରୀ ଘଟଣାସ୍ଥଳରେ ନପହଞ୍ଚିବାରୁ ଲୋକେ ଗୁରୁତର ବିମଳଙ୍କୁ ଏକ ଅଟୋ ଯୋଗେ ବୌଦ୍ଧ ଡାକ୍ତରଖାନାରେ ଭର୍ତ୍ତି କରିଛନ୍ତି । ତାଙ୍କ ଅବସ୍ଥା ଗୁରୁତର ଥିବା ବେଳେ ଏହି ଅତ୍ୟନ୍ତ ଗରିବ ପରିବାରକୁ ସରକାରୀ ସହାୟତା ଯୋଗାଇ ଦେବାକୁ ସାଧାରଣରେ ଦାବି ହୋଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଈଟିଭି ଭାରତ
