ବୌଦ୍ଧ: ପୂର୍ବ ଶତ୍ରୁତାକୁ କେନ୍ଦ୍ର କରି ଜଣେ ଯୁବକଙ୍କୁ ସମ୍ପର୍କୀୟ ଭାଇ ଓ ଭଣଜା ମିଶି ପିଟି ପିଟି ହତ୍ୟା କରିଛନ୍ତି । ଏଭଳି ଅଭାବନୀୟ ଘଟଣା ବୌଦ୍ଧ ଥାନା ଅନ୍ତର୍ଗତ ଆମ୍ବଝରୀ ପଞ୍ଚାୟତ ଝାଙ୍କରପଡା ଗ୍ରାମରେ ଦେଖିବାକୁ ମିଳିଛି । ଘଟଣା ସମ୍ପର୍କରେ ଖବର ପାଇବା ପରେ ପୋଲିସ ଘଟଣାସ୍ଥଳରେ ପହଞ୍ଚି ଅଧିକ ତଦନ୍ତ ଆରମ୍ଭ କରିଛି ।
ଝାଙ୍କରପଡା ଗ୍ରାମର ଡୋଳାମଣି କର୍ଣ୍ଣ ନାମକ ବ୍ୟକ୍ତି ଏକାକୀ ଥିବା ସମୟରେ ବୁଧବାର ରାତିରେ ତାଙ୍କ ନିକଟ ସମ୍ପର୍କୀୟ ଭାଇ ଓ ଭଣଜା ପୂର୍ବ ଶତ୍ରୁତାକୁ ନେଇ ତାଙ୍କୁ ଆକ୍ରମଣ କରିଥିଲେ । ସେମାନେ ଡୋଳାମଣିଙ୍କୁ ପିଟି ପଟି ହତ୍ୟା କରିବା ପରେ ଫେରାର ହୋଇଯାଇଥିଲେ । ଗୁରୁତର ଅବସ୍ଥାରେ ଡୋଳାମଣିଙ୍କୁ ଉଦ୍ଧାର କରି ବାଉଁଶୁଣୀ ଡାକ୍ତରଖାନାରେ ଭର୍ତ୍ତି କରାଯାଇଥିଲେ ମଧ୍ୟ ସେଠାରେ ତାଙ୍କ ମୃତ୍ୟୁ ହୋଇଥିଲା । ବୌଦ୍ଧ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ସେପଟେ ଗତ ଦେଢ ମାସରୁ ଊର୍ଦ୍ଧ୍ବ ସମୟ ହେଲା ଟିକରପଡା ପଞ୍ଚାୟତ ଗୁରୁଜୀମୁଣ୍ଡା ଗ୍ରାମର ନିରଞ୍ଜନ କହଁରଙ୍କ ନିଖୋଜର କୌଣସି ପତ୍ତା ମିଳୁନାହିଁ । ଗତ ଦେଢ ମାସ ତଳେ ନିରଞ୍ଜନ ନିକଟସ୍ଥ ଗମ୍ଭୀର ଦରହକୁ ଗାଧୋଇବାକୁ ଯାଇ ପାଣିରେ ବୁଡି ଯାଇ ଆଉ ଫେରି ନଥିବା ତାଙ୍କ ପତ୍ନୀ ଅଭିଯୋଗ କରିଛନ୍ତି । ଫଳରେ ଦେଢ ମାସ ହେଲା ନିରଞ୍ଜନଙ୍କ ପରିବାର ଅତ୍ୟନ୍ତ ଦୁଃଖଦ ଅବସ୍ଥାରେ କାଳ କାଟୁଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
