ବୌଦ୍ଧ: ବୌଦ୍ଧ ଜିଲ୍ଲାର ଗୁନ୍ଦୁଳିଆ ସେବା ସମବାୟ ସମିତିରେ ଦୀର୍ଘ ଦିନ ହେଲା ତାଲା ଝୁଲୁଛି । ଏବେ ସବୁଆଡେ ଧାନକ୍ରୟ ଚାଲିଥିବା ବେଳେ ଏହି ଅଞ୍ଚଳର ଚାଷୀ ଧାନ ବିକ୍ରି କରିନପାରି ହନ୍ତସନ୍ତ ହେଉଥିବା ଅଭିଯୋଗ କରିଛନ୍ତି ।
ମଣ୍ଡିରେ ଝୁଲୁଛି ତାଲା, ଧାନ ବିକ୍ରି ନେଇ ଚିନ୍ତାରେ ଚାଷୀ
ଏପଟେ ସମବାୟ କମିଟିକୁ ଜାଣିଶୁଣି ବିଭାଗୀୟ ଅଧିକାରୀ ଭାଙ୍ଗି ଦେଇଥିବାରୁ ଏଭଳି ଅଚଳାବସ୍ଥା ସୃଷ୍ଟି ହୋଇଥିବା ଚାଷୀ ଅଭିଯୋଗ କରିଛନ୍ତି । ଧାନ କିଣାବିକା ସମୟରେ ଏଭଳି ପରିସ୍ଥିତି ଯୋଗୁଁ ଚାଷୀ ନିଜଧାନକୁ ବସ୍ତାରେ ଭରି ଜଗି ରହିଛି । ନଚେତ ଦଲାଲ ହାତରେ କମ ଦରରେ ଟେକି ଦେବାକୁ ବାଧ୍ୟ ହେଉଛି ଚାଷୀ ।
ଏ ସମ୍ପର୍କରେ ଯୋଗାଣ ଅଧିକାରୀ କହିଛନ୍ତି ଯେ ଉକ୍ତ ସ୍ଥାନରେ ଦୁଇଟି ଗୋଷ୍ଠୀ ମଧ୍ୟରେ ବିବାଦ ଯୋଗୁଁ ଏଭଳି ପରିସ୍ଥିତି ଉପୁଜିଛି । ଆଗାମୀ ଦୁଇ ତିନି ଦିନରେ ଆଲୋଚନା ମାଧ୍ୟମରେ ଏହାର ସମାଧାନ ହୋଇଯିବ ବୋଲି ସେ କହିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
