ବୌଦ୍ଧ: ଜିଲ୍ଲାରେ କୋରୋନା ସଂକ୍ରମଣରେ ବ୍ରେକ ଲାଗୁନି । ଜିଲ୍ଲାରେ କୋରୋନା ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଇ ଚାଲିଥିବାବେଳେ ଗତକାଲି ଠାରୁ ଜିଲ୍ଲାର ବିଭିନ୍ନ ସ୍ଥାନରେ ବାତ୍ୟା ୟସ ପ୍ରଭାବରେ ବର୍ଷା ଲାଗି ରହିଛି ।
ଜିଲ୍ଲାର ପ୍ରତିଦିନ ଦୁଇ ଶହରୁ ଚାରି ଶହ କୋରୋନା ସଂକ୍ରମିତ ଚିହ୍ନଟ ହେଉଛନ୍ତି । ବୁଧବାର ବୌଦ୍ଧ ଜିଲ୍ଲାର ବିଭିନ୍ନ ସ୍ଥାନରୁ 206 ଜଣ ସଂକ୍ରମିତ ଚିହ୍ନଟ ହୋଇଥିବାବେଳେ ସମୁଦାୟ ଆକ୍ରାନ୍ତଙ୍କ ସଂଖ୍ୟା 8979ରେ ପହଞ୍ଚିଛି । ସେପଟେ ସାମୁଦ୍ରିକ ବାତ୍ୟା ୟସ ପ୍ରଭାବରେ ବୌଦ୍ଧ ଜିଲ୍ଲାର ବିଭିନ୍ନ ସ୍ଥାନରେ ଗତକାଲି ଠାରୁ ବର୍ଷା ଲାଗି ରହିଛି । ଫଳରେ ଗରିବ ଲୋକଙ୍କ ଦୁଃଖ ବେଶ ବଢିଯାଇଛି । ସେପଟେ କୋରୋନା ସଂକ୍ରମଣ ସହରାଞ୍ଚଳ ଅପେକ୍ଷା ଗ୍ରାମାଞ୍ଚଳରେ ଅଧିକ ବୃଦ୍ଧି ପାଉଥିବାବେଳେ ଅଦିନିଆ ବର୍ଷା ସଂକ୍ରମିତଙ୍କ ପରିବାରର ଚିନ୍ତା ବଢାଇଦେଇଛି । ଜିଲ୍ଲାର ସମସ୍ତ ପଞ୍ଚାୟତରେ ଟିଏମସି ସେଣ୍ଟର ନଥିବାରୁ ଅଧିକାଂଶ ଅମାନିଆ ଏପରିକି ପଜିଟିଭ ଥିବା ରୋଗୀମାନେ ଖୋଲାଖୋଲି ଗ୍ରାମରେ ବୁଲୁଥିବା ଅଭିଯୋଗ ହୋଇଛି ।
ବୌଦ୍ଧ ଜିଲ୍ଲାର ସରସରା, ବ୍ରାହ୍ମଣୀ ପାଲି,ବାଉଁଶୁଣୀ, ମୁଣ୍ଡିପଦର ଭଳି ବିଭିନ୍ନ ସ୍ଥାନରେ କିଛି ସଂକ୍ରମିତ କୋରୋନା କଟକଣାକୁ ଆଦୌ ମାନୁନଥିବା ଜଣାପଡିଛି । ଯାହାକୁ ନେଇ ବୁଦ୍ଧିଜୀବୀ ଗଭୀର ଉଦବେଗ ପ୍ରକାଶ କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି,ଇଟିଭି ଭାରତ
