ବୌଦ୍ଧ: ବାତ୍ୟା 'ଫନି' ଚାଲିଯିବା ପରେ ଲୋକଙ୍କ ଦୁଃଖ ବଢିବାରେ ଲାଗିଛି । ବାତ୍ୟା ପ୍ରଭାବିତ ଅଞ୍ଚଳ, ଉଜୁଡା ଘର ଓ ଅସହାୟ ମଣିଷଙ୍କ ଦୁର୍ଦ୍ଦଶା କହିଲେ ନସରେ । ଗୋଟିଏ ପଟେ ଅସହ୍ୟ ଗରମ, ଅନ୍ୟପଟେ ପେଟ ପାଇଁ ଖାଦ୍ୟ ନିହାତି ଜରୁରୀ । ଫନି ପ୍ରଭାବିତଙ୍କ ପାଇଁ ବିଭିନ୍ନ ଅନୁଷ୍ଠାନ ଓ ସ୍ବେଚ୍ଛାସେବୀ ଅନୁଷ୍ଠାନ ପକ୍ଷରୁ ସହାୟତା ଯୋଗାଇ ଦିଆଯାଉଛି ।
ଏନେଇ ସହାୟତାର ହାତ ବଢାଇଛନ୍ତି ବୌଦ୍ଧ ଜିଲ୍ଲାର ପୋଲିସ ପ୍ରଶାସନ । ବାତ୍ୟା ପ୍ରଭାବିତ ଅଞ୍ଚଳ ଗୁଡିକରେ ବୌଦ୍ଧ ପୋଲିସ ପକ୍ଷରୁ 2ଟି ଗାଡିରେ ବିଭିନ୍ନ ଅତ୍ୟାବଶକୀୟ ସାମଗ୍ରୀ ଓ ଖାଦ୍ୟ ପଦାର୍ଥ ବାତ୍ୟା ବିପନ୍ନ ପୁରୀବାସୀଙ୍କୁ ଯୋଗାଇ ଦିଆଯିବ ।
ଆସନ୍ତାକାଲି ସକାଳ ସୁଦ୍ଧା ଏ ସମସ୍ତ ରିଲିଫ ସାମଗ୍ରୀ ଉପକୂଳବର୍ତ୍ତୀ ଅଞ୍ଚଳରେ ପହଞ୍ଚିବ ବୋଲି ବୌଦ୍ଧ ଜିଲ୍ଲା ଥାନା ଅଧିକାରୀ ତପସ୍ବୀନି ପ୍ରହରାମ ସୂଚନା ଦେଇଛନ୍ତି । ଏହାସହ ସମସ୍ତ ସାମଗ୍ରୀକୁ ସେଠାକାର ପୋଲିସ ପ୍ରଶାସନର ସହାୟତାରେ ସ୍ଥାନୀୟ ଅଞ୍ଚଳରେ ବଣ୍ଟନ କରାଯିବ ।
ବୌଦ୍ଧରୁ ସତ୍ୟନାରାୟଣ ପାଣି, ଇଟିଭି ଭାରତ
