ବୌଦ୍ଧ: ଜିଲ୍ଲାର ମନମୁଣ୍ଡା ଥାନା ଲମ୍ବସରୀ ପଞ୍ଚାୟତ ପାଇଁ ଆସିଥିବା ଭତ୍ତା ଟଙ୍କା ଲୁଟ୍ ହୋଇଥିବା ଅଭିଯୋଗ ହୋଇଛି । ଶୁକ୍ରବାର ଏହି ପଞ୍ଚାୟତର ନିର୍ବାହୀ ଅଧିକାରୀ ବିପୁଲ ଦାସ 3 ଲକ୍ଷ 93 ହଜାର ଟଙ୍କାର ବାର୍ଦ୍ଧକ୍ୟ ଭତ୍ତା ନେଇ କାର ନମ୍ବର OD-27A-1369ରେ ଆସୁଥିଲେ । ଆସିବା ସମୟରେ ଡିମିରିମୁଣ୍ଡା କ୍ରସର ନିକଟରେ 5 ଜଣ ଦୁର୍ବୃତ୍ତ ଦୁଇଟି ବାଇକରେ ଆସି ବନ୍ଧୁକ ଦେଖାଇ ତାଙ୍କ ଠାରୁ ଟଙ୍କା ଛଡେଇ ନେଇଥିଲେ ।
ଘଟଣା ସମ୍ପର୍କରେ ସେ ତୁରନ୍ତ ମନମୁଣ୍ଡା ଥାନାରେ ଅଭିଯୋଗ କରିଥିଲେ । ଥାନା ଅଧିକାରୀ ଗୋପୀନାଥ ପ୍ରଧାନ ଏକ ମାମଲା ରୁଜୁ କରି ଏ ଘଟଣାର ତଦନ୍ତ ଆରମ୍ଭ କରିଛନ୍ତି । ବର୍ତ୍ତମାନ ସୁଦ୍ଧା ଡକାୟତଙ୍କ ସମ୍ପର୍କରେ କୌଣସି ଖୋଜଖବର ମିଳିନାହିଁ ।
ବୌଦ୍ଧରୁ ସତ୍ୟନାରାୟଣ ପାଣି, ଇଟିଭି ଭାରତ
